A pesca artesanal arma unhas Xornadas reivindicativas polo futuro do mar

Corcubión Costa da Morte

10:39 24/02/15

Xornadas de Pesca Artesanal de Corcubion

Non parou o sector da pesca artesanal de pelexar polo seu, de pelexar polo mar. Despois da campaña de manifestacións que levou a cabo durante novembro e decembro do ano pasado, agora toca crear algo. E por iso, dende a Confraría de Corcubión, a que liderou as concentracións, xa están preparando as “Xornadas Reivindicativas dunha pesca artesanal sustentable, baixo o lema “Defender o noso mar. Ten Futuro”.

Serán dúas sesións na Casa da Cultura de Corcubión, para os días venres 27 e sábado 28 de febreiro de 2015. O venres toca sesión didáctica cos máis pequenos. Serán os os rapaces do 3º ciclo do CEIP Praia de Quenxe corcubionés os que visiten as instalacións da Confraría de Pescadores, o porto e a Lonxa.

Xa o sábado, a partir das 12:00h, toca reflexión dos maiores. Presentará a sesión o Patrón Maior do pósito corcubionés, José Domínguez Buiturón, xunto ao alcalde Francisco J. Lema, Chisco. De seguido, o biólogo Xoán Lueiro falaranos sobre a “A pesca artesanal na procura de sustentabilidade ecolñoxica, económica e social”.
Haberá tamén unha mesa redonda e debate entre biólogos e membros da confrarías, antes da Entrega de premios do certame de poesía aberto para os cativos do cole corcubionés, amenizado polo pequeno recital que darán Chisco Fernández Naval e Alexandre Nerium, dous poetas costeiros moi vencellados ao mundo do mar.