Faltan 5 días para FITUR pero xa imos perfilando posicións. Unha das primeiras presencias claras será a do Plan de Sustentabilidade Turística en Destino de ‘Os Fogóns do Anllóns’. O proxecto bergantiñán dirixido pola Deputación da Coruña será, xunto ao das ‘Fragas do Eume’, a protagonista dos actos institucionais da área de Turismo dirixida por Xosé Regueira.

"É unha estratexia turística baseada no valor do propio e nas potencialidades do noso territorio”, sinala un Regueira que apunta que “levamos moitos anos traballando de xeito constante priorizando a calidade sobre a cantidade, apostando claramente por iniciativas que inclúan parámetros de sustentabilidade, que poñan en valor a autenticiadade do noso territorio e das e dos profesionais que traballan nel e, sobre todo, na defensa dun retorno económico para a comunidade local”.

A presentación de ‘Os Fogóns do Anllóns’ terá lugar o mércores 18 ás 12:30h no stand de Turgalicia. Nesta presentación tratarase de poñerlle voz e cara ao proxecto a través dun audiovisual que recollerá intervencións de representantes de sectores como o colectivo de mariscadoras do esteiro do Anllóns, de produtores de legumes e pataca, panadaría, restauración e mesmo deportistas que utilizan o propio Anllóns para as súas prácticas deportivas.
O audiovisual tamén recollerá as voces dos cinco alcaldes dos concellos que conforman o proxecto – A Laracha, Carballo, Coristanco, Ponteceso e Cabana-, e a do vicepresidente da Deputación.

Historial do proxecto

• Decembro 22: O proxecto turístico “Os fogóns do Anllóns” xa está en marcha cun 1,5 millóns de euros
• Maio 22: O Proxecto Anllóns chámase ‘Os fogóns do Anllóns’ e aposta pola gastronomía.
• Febreiro 22: Medio millón para arrincar a primeira fase do Proxecto Anllóns: unha gran senda verde de 53km.
• Outubro 21: Constituído o Consello de Dirección do Proxecto Anllóns pensando nos Fondos Next Generation.
• 24-09-21: Creado un ente intermunicipal para xestionar o "Proxecto Anllóns”.
• Xullo 21: Deputación e 5 Concellos de Bergantiños crean o “Proxecto Anllóns”.