A Xunta avisa do “máis que probable” peche da actividade non esencial nos 5 concellos en Nivel 3 da comarca Bergantiños

Reunion Cos alcaldes de Bergantinos — Imaxe da reunión virtual entre os alcaldes de Bergantiños e Soneira coa Consellería de Sanidade e o Sergas

13:08 12/11/20

Os datos da incidencia do COVID de hoxe non son nada positivos e seguen sinalanzo a comarca de Bergantiños zona vermella. Ata o punto de que esta mañá, a Consellería de Sanidade comunicáballe aos alcaldes da zona que o Comité Clínico, “con toda probabilidade”, ía decidir este venres o peche perimentral dos 5 Concellos en nivel de alerta 3 da comarca, o que suporía o peche da actividade non esencial.

Haberá que esperar á decisión deste venres para ver se se confirma esta decisión, que afectaría polo menos, aos Concellos de Coristanco, Carballo (126 casos activos), Malpica (con 68 casos activos e onde o Sergas realizará este sábado un cribado masivo), Ponteceso (53 casos) e Cabana, provocando o peche da hostalería, confinamento perimetral dentro da bisbarra, e reunións con só convivintes.

A nova trasladáballa o Secretario Xeral da Consellería de Sanidade e o xerente da área sanitaria A Coruña-Cee nunha reunión telemática aos alcaldes de Ponteceso, Malpica, Cabana, Coristanco, Carballo, Vimianzo, Camariñas, Laracha, Laxe e Zas. Nas dúas comarcas de Bergantiños e Soneira os casos aumentaron nunha semana de 370 a 562 casos.

Pequena pola comarca de Soneira

Polo sur da comarca parece que a cousa mellora. En Camariñas por exemplo, aseguran que “a incidencia se estabiliza”, con 28 casos activos a día de hoxe, baixando así dos 32 constatados nos últimos días. Camariñas é, xunto a Laxe e Zas, un dos municipio menos afectado das dúas comarcas.

Por Vimianzo, por agora o único concello "pechado", a cousa segue complicada. A día de hoxe son 138 casos activos. En calquera caso, a alcaldesa solicita información diaria para “poder actuar, por exemplo, realizando desinfeccións nos espazos e lugares máis sensibles, e onde se observa unha maior incidencia do virus”.