Domingo. 28.11.2021
El tiempo

O Parlamento acorda, con unanimidade, afrontar as actuacións de seguridade do porto de Malpica

foto BNG - familiares patron Silvosa e confraría Malpica
O deputado Daniel Pérez e as deputadas Rosana Pérez e Carmela González con familiares do patrón falecido do "Silvosa", José Ángel Sanjurjo, e representantes da Confraría de Malpica no Parlamento galego)
O Parlamento acorda, con unanimidade, afrontar as actuacións de seguridade do porto de Malpica

Xa van case 3 anos dende que o fatídico accidente do Silvosa na entrada do porto de Malpica. Case 3 anos de estudos, de informes, de balizas, de promesas, mentres a xente do mar segue xogándose a vida diariamente.

Onte o asunto da seguridade no porto malpicán volveu ao Parlamento Galego, e saíu cunha teórica unanimidade, pois os 3 grupos chegaron a un acordo do Parlamento para impulsar as obras de mellora da seguridade da dársena de Malpica, fito do que se louban tanto BNG como PSOE.

O acordo permitirá incluir nos orzamentos de 2022 unha cantidade suficiente para a súa execución íntegra ou, no caso de realizarse por fases, incluír os recursos necesarios para a execución dunha primeira fase.

Unha decisión que aínda así para o voceiro do BNG, o carballés Daniel Pérez, ridiculiza ao PP que, “pese a secundar a iniciativa, repita os mesmos anuncios da Xunta dende hai tres anos sen avanzar en solucións reais”. “A situación é insostible e agora veñen a dicir que ata o 2022 vanse seguir medindo as correntes e que aínda do 2022 se vai licitar un proxecto”, critica. “É dicir, imos dicirlle aos mariñeiros que ata 2025 ou 2026 van ter que seguir convivindo con esta realidade”, lamenta.

Pérez defendeu que a alternativa única e definitiva “é a ampliación do dique”, para que as 232 [email protected] da confraría poidan seguir vivindo do mar.

O PSOE reivindica a moción

Tamén o grupo socialista reivindica a aprobación da súa iniciativa para mellora da seguridade nos portos de Malpica e Barizo. O grupo presentara unha moción para instar á Xunta a tratar do mesmo xeito a todos os concellos, independientemente da cor politica, considerando que a falta de actuación en Malpica se debía á cor do goberno municipal. O PP votou en contra desa moción, pero si escoitou, desta volta, as demandas socialistaspara “executen cando antes as obras de mellora da seguridade nos portos de Malpica e Barizo”.

O voceiro Martín Seco lamenta que as relacións entre o Concello de Malpica co goberno galego “nunca estiveron rotas, simplemente desatendidas” polo executivo autonómico, que fixo “ouvidos xordos ás súas necesidades”.

Recordou ademais que no porto malpicán “tamén hai que abordar con premura o remate do apuntalamento do tramo da dársena para o acceso de camións que asegure un tráfico pesado que pode traer algunha desgraza polo seu estado actual”. Lembra ademais que “hai tempo que o Concello pide insistentemente a reparación da grúa do porto de Barizo e o arranxo da rampa de acceso a aquel porto”, abandonado dende a última intervención feita polo goberno de Touriño, hai 12 anos.

Martín Seco Walter Pardo porto Malpica
Martín Seco visitou xa varias veces o porto malpicán


Os pequenos pasos do PP

Ana Belén García foi a voz do Grupo Popular na sesión parlamentaria, asegurando que “Portos de Galicia está a traballar desde o primeiro momento na busca dunha solución para evitar as elevadas correntes que se xeran ocasionalmente na comporta interior do porto de Malpica”. Argumenta que os retrasos se deben a que “se trata dun asunto complexo, pero do que xa se licitou o contrato para o deseño e avaliación de alternativas básicas; a definición da solución e a nova instrumentación da dársena; e a elaboración do deseño construtivo”, apuntou.

Asegurou que cómpre “seguir afondando no estudo as correntes mariñas”, e que xa teñen en marcha un “sistema experimental provisional sobre a previsión de correntes na comporta de Malpica cunha antelación de 72 horas, un sistema que pretende alertar e orientar aos usuarios sobre as condicións de acceso á dársena interior ante a propagación das ondas longas”.

Novas relacionadas

comentarios