Xa nolo contaban nos DirectosQPC o alcalde de Mazaricos como o de Santa Comba. “É indignante que a Xunta reactive o proceso dos Parques Eólicos en pleno estado de alarma se non podemos nin informar aos nosos veciños”.

Hoxe Xoan Blanco (BNG) e David Barbeira (CxG) únense aos rexedores de Negreira (PSOE), A Baña (PSOE) e Outes (CO), para pedirlle á Xunta a inmediata paralización dos trámites de parques eólicos iniciados no Estado de Alarma. Sosteñen que a reactivación de prazos para formular alegacións no mes de abril, en pleno confinamento, “impediu desenvolver” as xuntanzas precisas coas persoas afectadas e entre os propios municipios.

Demandan que se “proceda a modificar o actual marco normativo referido ao sector eólico en Galicia para que atenda aos intereses da poboación rural”. Ao fío disto afirman que “a enerxía eólica pode ser fomentada sen atentar contra os intereses socioeconómicos da contorna onde se produce”.

No escrito os cinco alcaldes subliñan que nos seus concellos a “veciñanza afectada por estes proxectos ten, en xeral, unha idade avanzada” e, ademais, non dispoñen de “acceso a Internet e, polo tanto, tampouco aos expedientes electrónicos do seu interese”. Nesta liña explican que se limitou a “posiblidade dos concellos de xuntarse coas persoas afectadas para explicarlles o estado da tramitación dos expedientes ou calquera tipo de circunstancia derivada”.

Veciñanza preocupada

A realidade é que os veciños e veciñas expresan unha fonda preocupación polo elevado número de proxectos eólicos, moitos deles en núcleos habitados. Os alcaldes tamén poñen de manifesto que a lexislación actual establece unha distancia mínima dos paus cos núcleos “insuficiente, pois só son 500 metros algo que non recolle a realidade poboacional galega”.

Fragmentación

Lamentan ademais a “fragmentación en diversos proxectos de parques, como o megaparque de Bustelo, Toural e Campelo, que, en realidade, amosan continuidade e comparten infraestruturas”. En base a isto consideran que “deberían ser considerados un único parque”.

Beneficios

Conclúen que “as poboacións rurais están a soportar en exclusiva os custos ambientais da produción de enerxía eólica mentres que os beneficios que permanecen nos territorios son mínimos”.

Novas relacionadas cos Parques Eólicos

• Xuño 2020: Os veciños propietarios de Corme aseguran o dereito a percibir o 4% da produción do novo parque eólico.
• Maio 2020: Alcalde de Mazaricos: “Non entendo que activen os prazos dos parques eólicos en estado de alarma se non podemos informar aos veciños”.
• Maio 2020: Greenalia rematará antes de final de ano tres parques eólicos en Dumbría e Vimianzo.
• O Cerqueiral, outra ameaza eólica para os montes de Cabana, Coristanco e Santa Comba.
• A veciñanza presenta alegacións ao Parque Eólico das Salgueiras.
• 31-03-2020: Desmontando o parque eólico de Corme en pleno estado de alarma.
• Novembro 19: "Levamos 19 anos sen saber que un viravento invadira as nosas fincas de Corme”.
• O Concello de Santa Comba loita contra a ubicación dos parques eólicos de Castriz.
• Colectivos de 6 concellos da Costa da Morte forman parte da Rede Galega por un Rural Vivo.
• Novembro 19: Santa Comba vestiuse de negro contra o “megaparque” eólico de Bustelo, Campelo e Toural.
• Abril 19: A desfeita das obras do parque eólico de Mouriños na Serra de Gontón, en imaxes.
• Febreiro 18: Regoelle, a tea de araña dos eólicos da Costa da Morte.
• Xullo 2018: O Concello de Vimianzo lamenta o proceder de Greenalia arredor do parque eólico.