Son uns dos grandes artífices da posta en marcha da campaña Muros Consumo Consciente, grazas, en boa medida, ás accións semellantes que promoveron en 2022 emais en 2021, cando a vila de Muros xa saía nas portadas das cabeceiras estatais por pechar polo Black Friday.

Fresco y del Mar, a empresa muradá que vende, por toda España, peixe e marisco fresco extraído por profesionais da pesca artesanal da Costa da Morte e da ría de Muros e Noia, vai pechar a súa canle online este venres 24, no marco da súa campaña anti-Black Friday.

Este ano reivindican que “Os nosos mares non celebran o Black Friday. Nós tampouco E ti? ÚNETE AO BLUE FRIDAY”, reza o lema.

A campaña vira ao redor dunha frase, “se o mar tivese un prezo…”, sobre a que Fresco e do Mar reflexiona: “Quizais 700 sería o xusto… como o número de especies mariñas ameazadas polo plástico neste preciso instante. Ou poida que axústese a un número máis alto, poñamos 3.900… como as toneladas de plástico vertidas este ano só no noso Océano Atlántico”.
“Pero sexamos atrevidos, ascendamos a cifra e redondeemos a 100.000… como o número de animais mariños que morren por mor do plástico cada ano. Ou, se realmente valoramos os nosos mares, o xusto sería situar o prezo ao redor dos 12.700.000… como as toneladas de lixo que anualmente pasan a formar parte dos océanos”, engade a empresa.

“En realidade, o valor dos nosos mares é incalculable. A destrución dos mesmos si ten cifra e vai en aumento. Non participamos da espoliación consumista dos océanos nin do consecuente proceso de basurización dos mesmos. Os nosos mares non celebran o Black Friday. Nós tampouco. E ti? Por unha compra ética e xusta. Por unha pesca respectuosa e sostible. Únete ao Blue Friday”, conclúe.

“Durante todo o ano somos fieis á nosa filosofía, que defende a pesca galega artesanal, a prezos xustos e sostibles. Non podemos botar pola borda o traballo de todo o ano nunha xornada de consumismo barato”, explica Milucho Louro, portavoz de Fresco e do Mar.

Doazón

Ademais, o 5% das súas vendas desde onte luns e ata o xoves, 23 de novembro, serán destinados a Cáritas Muros, unha iniciativa que xa realizaron en anos anteriores.

NOVAS RELACIONADAS

• Novembro 23: A campaña Muros Consumo Consciente xa está na rúa.
• Novembro 22: Muros pecha por Black Friday.
• 2021: O contra #BlackFriday de “FrescoydelMar”, para Cáritas.