Exercicio de democracia

Deportes Fútbol da Costa Firmas QPC Deportes

11:20 16/02/11

Veñen de celebrarse este pasado xoves as votacións que decidiron a composición da asemblea da Federación Galega de Fútbol, o órgano representativo máximo do noso deporte, que en posteriores datas tomará a importante decisión de nomear ó presidente que rexerá os destinos do fútbol galego os próximos catro anos. O complexo procedemento electoral iniciouse así, e vistos os primeiros resultados, non nos queda mais que felicitarnos polos ámbitos costeiros. Dende a xa lonxana presenza do ben querido dirixente baies Xulio Díaz, a Costa non contara con voz dentro da Federación, si exceptuamos a presenza dos clubs de categoría nacional Santa Comba e Bergantiños, que tiñan praza pola súa presenza na Terceira División. Escasa representación, e ben alonxada dos problemas de base que sufre o noso fútbol, centrados nas categorías de 2ª e 3ª autonómica. Antes de facer ningunha valoración persoal, paso a enumerar os concluíntes datos:

No que respecta a clubs, os dous máis votados na zona que comprende a cidade da Coruña, as Mariñas e a Costa, foron o U.C.Cee e o Soneira. Saen con posto na Asemblea tamén o Ponteceso, o Baio, a Esteirana e o Muxía. Un total de 6 clubs que defenderan os intereses costeiros.
En canto a xogadores o dato tamén é importante: o máis votado foi Alberto Felipez Ventureira, REPI, seguido do fisterrán NOÉ, xogador do Cerceda. En cuarto lugar atopamos a IVAN PEQUEÑO, xogador do Dumbría. De un total de 6 postos, a Costa conta con tres distinguidos representantes.

O primeiro que me chama a atención é o altísimo grado de MOBILIZACIÓN que houbo entre os representantes dos clubs costeiros e os propios xogadores, que acudiron en número elevado a exercer o seu dereito a voto. Éste aspecto explica en parte os resultados finais obtidos. Foi unha alegría tremenda ver na praza de Vigo coruñesa a xogadores do Cee charlando con compañeiros do Dumbría, a rapaces de Castriz retándose para futuros enfrontamentos con amigos do Sofán ou do Ponteceso, todo nun ambiente de complicidade e compañeirismo. Foi unha ocasión para ver que son mais cousas as que nos unen que as que nos separan, e que un xogador do San Lorenzo ten inquietudes parecidas a un do Outes, por moitos kilómetros que nos separen no mapa. Por outra parte, é reconfortante comprobar un PROCESO DEMOCRÁTICO SAN dende a primeira fila, onde en diversas reunións e conversas mantidas con posibles candidatos, representantes da Federación e entre os propios clubs, o que verdadeiramente se conqueriu foi abrir un debate sobre os verdadeiros problemas do fútbol costeiro e no que se aportaron solucións, ou polo menos se abriron sendas de dialogo que seguro que nos levarán a bo porto de seguir por esta liña. Os dirixentes que levamos os destinos dos nosos clubs adiante seguro que aprendemos moito neste proceso, intercambiamos opinións con outros colegas, e como reseñei antes, vimos que mostrándose unidos e loitando no mesmo fronte se poden conquerir cousas importantes. Porque algo que si que xa se obtivo foi SITUAR A LIGA DA COSTA EN PRIMEIRA LIÑA, que a xente que tomará as decisións nun futuro moi cercano nos tivera en conta, oíra as nosas problemáticas e opinións e vira a forza que podemos facer cando remamos na mesma dirección. Como elemento aglutinador debe estar, como estivo neste proceso, a ASOCIACIÓN DE CLUBS DA COSTA, que non é mais que un foro de reunión dos intereses dos nosos diversos clubs, unha plataforma onde unirnos e loitar por cousas que nos afectan a todos. ESPERTEMOS DUNHA VEZ, pelexemos polo que nos gusta de verdade, que é facer ós nosos equipos e ó noso fútbol o mais grande posible. Indo todos da man, cada un coas súas opinións, pero co respecto ó club veciño por diante, seguro que conseguiremos cousas. Hai moito por facer, porque hai pouco feito, pero precisamente este camiño que se antolla longo, promete ser emocionante, e a recompensa final seguro que vale a pena.