Lariño celebran a primeira vitoria coa apertura do entorno do Faro por parte de Portos

10:31 18/09/14

Se cando un protesta, é máis que posible que o escoiten. Así está a acontecer en Lariño, onde o Concello de Carnota e a AAVV Insua de Lariño levan un mes en pé de guerra para Salvar o Faro de Lariño e convertelo nun Eco-Centro.

Polo de pronto, despois dunha gran actividade mediática, xa están a celebrar a primeira pequena vitoria, pois durante unha reunión entre Portos e veciños, a delegación carnotá logrou arrincarlle a Portos o compromiso de que abrirá o entorno do Faro ao público, medida que se fará efectiva na próxima semana mediante un Convenio polo que Concello e veciños colaborarán, ademais, coa conservación e o mantemento deste novo espazo público do que disporá o Concello de Carnota.

Os veciños consideran “chave” este paso, pois a zona leva pehcada dende que o último fareiro abandonou o Faro.

Seguinte paso, a cesión

Pero se os veciños venceron o primeiro, parece que vai ser un partido a 5 sets, falando en termos tenísticos. Son conscientes de que queda moito por facer. E a primeira oferta de Portos é bastante difícil de manter: A Autoridade Portuaria asegura para ceder a utilización do Faro a calquera actividade cobrará un canon de 14.000 euros anuais, ao que habería que sumarlle un 8% dos beneficios en caso de albergar algunha actividade que xere ingresos económicos.

Unhas cifras que alteran aos veciños, cando a iniciativa só pretende recuperar para o disfrute de toda a sociedade un edificio que leva anos en desuso e que ademais ameaza ruína, sen necesidade de afectar en absoluto a súa actividade orixinaria pois coa automatización só emprega a torre da lanterna.

Aprazada a xornada de portas abertas

Por outra banda, a Autoridade Portuaria non autorizou de momento a xornada de portas abertas que os veciños querían levar a cabo este mes. Unha visita que poderá ser en masa ou por grupo reducidos, para intentar que a Xunta axilice este trámite o máis posible.