Recuperando o camiño das peixeiras para cruzar o Monte Pindo

Carnota Dumbría Mazaricos Costa da Morte Monte Pindo Parque Natural

Recuperando o camiño das peixeiras para cruzar o Monte Pindo

09:04 01/03/12

Fantástica a proposta veciñal para seguir recuperando o patrimonio etnográfico do Olimpo Celta de Otero Pedraio. Mentres os apoios para a catalogación do Monte Pindo como Parque natural seguen aumentando, aínda quedan moitos tesouros por descubrir entre as rochas graníticas da mole.

Un deses tesouros é un "antigo camiño ao Fieiro", ou como queren chamalo o "Roteiro das Peixeiras", usado sobre todo polas veciñas as peixeiras do Pindo, e como non, polas xentes do Fieiro e arredores para vender pola costa ou para viaxar a Cee, unha vez cruzado na barca antes de facerse a ponte que une O Pindo e o Ézaro". Así nolo conta Joaquín Pais, un dos valedores da recuperación da ruta, que xa leva 4 domingos rubindo o monte para limpar o camiño.

Un camiño con historia

Joaquín tirou dos pesos pesados da vila para coñecer a ruta. Quen mellor que Pepe do Fieiro para lembrar por onde subían as peixeiras. Este home sabe de todo e xa foi protagonista dunha documental da Produtora Faro sobre as covas dos agochados no franquismo, que tamén estamos recuperando dende esta casa.

Pepe é do lugar do Fieiro, no Concello de Mazaricos, na entrada pola parte traseira do monte, e ademais está casado no Ézaro. "De rapaz", cóntanos Joaquín, "tanto el como o seu pai tiveron cabras no monte e coñece cada pedra polo seu nome. E que vou dicir das anécdotas que vai contando... Hai pouco precisamente falamos de cando as mulleres do Pindo viñan cargadas cas súas caixas de sardiñas á cabeza, subindo por unha laxe empinada que el lle chama laxe Miravel, e que as xentes do Pindo lle chamaban laxe dos cabalos. Dicía el que cando subían cargadas e baixaban cargadas era boa sinal pois aparte das sardiñas que poideran vender algunhas trocavánas por ovos por millo ou por patacas", conta Joaquí sobre o saber de Pepe.

Xornadas de voluntariado de limpeza

O caso é que para recuperar o camiño ata arriba, precisaríanse varias sesións de limpeza. A idea primeira é a de abrir o camiño dende O Ézaro para subir a Peñafiel emais a Cova da Xoana, ou para baixar tras subir á Moa dende O Pindo.
Despois de abrir este camiño e si a xente se anima, poderíanse abrir outros dous alternativos: un que sería polo norte, que empezaron a utilizar as xentes que segundo Pepe, traballarón na construción do peirao do Pindo; e outro sería polo sur que usaban cando tiñan que subir con cabalo.

O caso que o propio Joaquín invita a todo aquel que queira a quedar este domingo entre as 9:30h e as 10:00h na antiga canteira que hai do lado carnotán da ponte do Ézaro, armados con un mochila, un pouco de auga, unha camiseta de repuesto, uns guantes para os toxos, e un machéte fouciño ou algo que se lle pareza, para poder limpar entre todos o "Roteiro das peixeiras".

Ademais, a Asociación Monte Pindo Parque Natural confirma que colaborará coa xornada de limpeza.