Continúa o Concello de Zas e a Fundación Brandomil rescatando a historia da Pedra do Altar. Baixo a dirección de Lino Gorgoso, un equipo de arqueólogos están estes días a realizar os traballos correspondentes á IV Fase deste ambicioso proxecto que pon de relevancia a importancia que tivo o lugar durante a época romana.

Son moitos os veciños e veciñas, así como turistas, os que se achegan estes días ata a zona para observar o avance dos traballos, dos que as primeiras impresións desta fase son moi positivas. Tal e como sinalan os expertos, o obxectivo é ampliar e delimitar a domus romana, de enormes proporcións, identificada nas escavacións que se levaron a cabo o verán pasado. Ao mesmo tempo, nesta fase tamén está previsto decapar toda a superficie da finca da Pedra do Altar, facer a consolidación dos muros e secuenciar as dúas vías romanas atopadas nos últimos anos.

Saca peito o Goberno do BNG de Zas sobre o seu compromiso para co patrimonio, sumando esta actuación aos case 100.000 euros investidos coas arcas municipais nas diferentes actuacións realizadas nos últimos anos co fin de conservar, protexer e poñer en valor a riqueza arqueolóxica de Brandomil.
Entre os principais achádegos destas intervencións están un tramo do Camiño Real que unía Negreira con Muxía, e que está situado áo carón da ponte vella; xunto coas importantes estructuras que se están a descubrir na Pedra do Altar que segundo as probas de Carbono-14 corresponden ao século I e comezos do II da nosa Era.

Máis novas de Brandomil