COVID: Os alcaldes de Bergantiños piden máis cribados, con conclusións, para parar o avance do virus

Alcalde de Carballo xuntanza_conselleiro_sanidade — Xunta virtual dos alcaldes de Bergantiños coa Consellería de Sanidade

08:56 19/11/20

Este mércores, os alcaldes da comarca de Bergantiños e a alcaldesa de Vimianzo mantiveron unha nova xuntanza virtual co conselleiro Julio García Comesaña e outros cargos da Consellería de Sanidade para analizar o avance do covid na zona. Un avance que, como vimos onte, segue “á alza”, sen controlarse en algún dos 6 concellos perimetrados da comarca bergantiñá, que ten nestes momentos “a incidencia acumulada máis alta de todas as zonas que están perimetradas”, segundo indicaron os responsables da sanidade galega, xa que a media supera os 800 casos por 100.000 habitantes. Son 112 casos máis que hai 7 días na comarca.

Unha situación contra a que os rexedores solicitaron máis cribados como o realizado este pasado sábado en Malpica, onde se fixeron 350 probas aleatorias ao sector do mar e ás traballadoras do Servizo de Axuda no Fogar.

Pero cribados con conclusións, porque o dende Malpica explican que non recibiron ningín informe nin conclusión sobre o cribado realizado. Coñecemos, a través da confraría, que se deron arredor dunha vintena de positivos no sector do mar (dun total de 75 casos activos), que obriga a parar só 3 barcos. En todo caso, “o cribado serveu para paralizar algo os focos no porto e para tranquilizar a xente”, valoran dende o pósito.

En Carballo hai gran preocupación pola situación do CEIP Fogar, que con 39 casos activos e 9 aulas pechadas, é o centro de ensino con maior incidencia de Galicia. Á opinión do alcalde, Evencio Ferrero, debería ser un punto de cribado inmediato.
Carballo ten 185 casos, pero unha unha incidencia máis baixa, 577 casos por 100.000 habitantes, a máis baixa da zona, aínda lonxe dos 125 casos aos que se deberían chegar para eliminar as restricións.
O covid chega tamén ao fútbol, e o Bergantiños FC confirmaba onte dous novos positivos no primeiro equipo.

No extremo oposto sitúase Cabana, cunha incidencia de 1.500 casos por 100.000 habitantes. Só Laxe mellora, con 6 casos menos que a semana pasada, e xa en cor ver por non ter casos novos.

Mellora a situación en Vimianzo

En Vimianzo son 80 casos activos a día de hoxe, pero onte baixaban á cor laranxa porque nos últimos 7 días só se deran 19 novos casos. A incidencia baixo durante estas semanas dende que Vimianzo está parado, pero a tasa aínda está en 892 casos por cada 100.000 habitantes.

Restricións

Tendo en conta que a tendencia segue sendo “á alza” as restricións impostas vanse manter polo menos ata o 4 de decembro, pero non se atreven a valorar se nesa data se poderán levantar.

Mapa de alertas

Poucos cambios hai con respecto ao mapa de onte:

Nivel 3 (máis de 21 casos positivos por confirmados por PCR na última semana): A Laracha, Carballo, Coristanco, Malpica, Cabana.
Nivel 2 (entre 14 e 21 casos positivos confirmados por PCR na última semana): Santa Comba, Vimianzo e Ponteceso.
Nivel 1 (entre 7 e 14 casos positivos confirmados por PCR na última semana): Dumbría e Muros.
Nivel 0 (menos de 7 casos positivos confirmados por PCR na última semana): Cee, Laxe, Muxía, Camariñas, Fisterra, Corcubión, Mazaricos, Carnota e Zas.

No Hospital Virxe da Xunqueira temos 12 ingresados en planta (1 máis ca onte).