#SoandoconForza: A realidade dos festivais na Costa da Morte

#SoandoconForza: A realidade dos festivais na Costa da Morte

07:30 28/09/22

Este verán que acaba de rematar chegou cargado de novas iniciativas musicais á Costa da Morte. A pesar da falta dun festival de referencia de música “alternativa” como puido ser no seu día o V de Valarés, o Nordestazo ou o Sereas e Piratas, que este ano volvía pero que tristemente non conseguiu arrancar, proliferaron festivais de pequeno formato con interesantes propostas que animaron as vilas da Costa.

Non fixeron falta grandes organizadores nin grandes patrocinadores, triunfou o “faino ti mesmo” sen máis pretensións que pasar unhas horas en boa compañía e con boa música.

Estes son algúns dos festivais que se celebraron este verán na Costa da Morte:

4 de xuño, primeira edición do Cremita Fest na Eira bar, Ponteceso.
30 de xullo, primeira edición do Bardanca Fest, Casa Bardanca, Oza.
Do 20 ó 28 de agosto, segunda edición do Rueiros da vila, Caión.
9 de setembro, segunda edición do Cremita Fest na Eira bar, Ponteceso, con motivo do 40º aniversario da Eira Bar.
10 de setembro primeira edición do Baleafest, Malpica.
10 de setembro, cuarta edición ENDLESS SUMMERPARTY no Raz surfcamp, Razo.

Con esta lista de novos festivais, que esperemos que perduren moitas máis edicións, sumados aos xa tradicionais como o Festiletras (este ano celebrou a súa cuadraxésima edición), o Rockin Carballo e o Xiria Pop, que esta fin de semana celebrou a súa vixésimo quinta edición, semella que aínda queda bo criterio musical na nosa Costa.