Marta Lado: "Con Sicixia descubro lugares e sensacións da Costa da Morte que non coñecía"

Marta Lado: "Con Sicixia descubro lugares e sensacións da Costa da Morte que non coñecía"

14:15 10/03/16

A fisterrá Marta Lado e Monti Castiñeiras son os protagonistas de Sicixia Olalla é unha das protoganistas do filme Sicixia que se está a rodar estes días na Costa da Morte baixo a dirección de Ignacio Vilar. Marta Lado, metade de Fisterra e metade de O Pindo, é a encargada de darlle vida a este personaxe que en novembro chega á gran pantalla. A través dela, o espectador coñecerá o carácter e as costumes das mulleres da Costa da Morte.

QPC: ¿Que significa para ti ser a protagonista dunha película rodada na túa terra?

Para min rodar unha película na miña terra ten dous significados. Por unha parte, orgullo porque teño a oportunidade de representar a nosa personalidade, o noso carácter, a nosa idiosincrasia. E, por outra parte, a responsabilidade que se vai a concentrar no personaxe de Olalla transmitindo a esencia da Costa da Morte.

QPC: ¿Quen é Ollala?

Olalla é unha rapaza da Costa da Morte, de Fisterra concretamente, que traballa recollendo algas para a empresa de Portomuíños. Esta moza representa o carácter da xente da Costa da Morte e tamén recupera a tradición da recollida de algas misturada coa modernidade por traballar para unha empresa punteira e con vistas ao desenvolvemento. Olalla fai de guía local para Xiao, que é un enseñeiro de son que vén á Costa da Morte a recoller documentos sonoros. Olalla ten que amosarlle os distintos lugares da zona.

QPC: ¿Descubriches lugares da Costa da Morte que non coñecías grazas á rodaxe de Sicixia?

Claro que sí, estou descubrindo sitios e sensacións novas. Por exemplo, nunca experimentara a pesca do cerco. Tampouco nunca estivera no monte Branco, na Ensenada do Trece e foi un descubrimento increíble ao igual que a furna da Buserana.

QPC: ¿Por que ningúen se debe perder de ver Sicixia?

Á xente da Costa da Morte vaille gustar verse representado en Sicixia e de que a gran pantalla recolla as nosas paisaxes. Ademais é un filme peculiar xa que aúna a realidade e a ficción.

A Moa é unha das moitas localizacións da Costa da Morte que se recollen en Sicixia

QPC: Deixando a un lado Sicixia, ¿cales son os teus recunchos favoritos da Costa da Morte?

Eu son moi de praia, polo que para min Mar de Fóra e o Rostro son dous lugares únicos nos que consigo sentirme a gusto.

QPC: ¿Cando te deches de conta de que querías ser actriz?

Dende pequena recordo que dicía que quería ser actriz pero non estaba moi ben visto (risas). Entón a miña ilusión quedou aparcada ata que me vin enriba dun escenario cun grupo de teatro da universidade. Cheguei ata aquí porque unha compañeira lle dixo ao director que a min me gustaría estar no grupo, e eu non fun consciente de dicirllo. Así que se me debían de notar as ganas.

QPC: ¿Cal é o teu soño como actriz?

Gustaríame a chegar a contar as miñas propias historias tanto como intérprete como escribíndoas. En definitiva o que me gusta é entreter. Non teño maiores soños que traballar no que me gusta.

QPC: ¿Cal é a túa película favorita?

¿Unha soa? Difícil resposta... pois encántame "Lo que el viento se llevó", vina algo así como 25.000 veces (risas). Hai moitas películas que dependendo do estado de ánimo no que estea recurro unha e outra vez.

QPC: ¿Quen é a túa actriz favorita?

Teño varias actrices favoritas... por exemplo, Emily Blunt, Susan Sarandon, Adriana Ozores, e moitas outras que saben transmitir a verdade. Con este filme, Nacho Vilar - co bo sabor que lle deixou "A Esmorga" - quere recoller os sons "da vida da Costa da Morte", polo que dende finais de febreiro e durante todo o mes de marzo rodarán nos lugares máis emblemáticos da bisbarra nos que ademais da paisaxe se recollerán os sons máis característicos. Presisamente, o equipo trasladarase esta tarde á fervenza do Ézaro.