Portos comeza a súa rolda de reunións coas entidades de Corcubión para explicar os procedementos do porto mixto
Esta semana, Portos de Galicia publicou e puxo a información pública o estudo de impacto ambiental do Porto Mixto de Corcubión. E comezou xa coa serie de reunións co sector.
Se o vindeiro mércores 19 de novembro, membros da Plataforma Porto Si, Mortos Non, reuniranse en Santiago de Compostela co presidente de Portos de Galicia, este pasado venres o mesmo José Antonio Álvarez, xa recibía a membros da Confraría de Pescadores de Corcubión e do club marítimo Carrumeiro.
Portos quere informar de primeira do recente inicio do período de información pública do estudio de impacto ambiental do proxecto do porto mixto de Corcubión. Álvarez Vidal trasladou a ambas entidades promotoras do proxecto que o pasado martes o Diario Oficial de Galicia publicou o anuncio deste trámite co que Portos de Galicia continúa avanzando cara á dotación dunhas novas instalacións para os profesionais e a náutica de recreo de Corcubión.
Tal como recolle o propio anuncio este prazo será de 30 días hábiles e a documentación do proxecto pode consultarse na web oficial de Portos de Galicia .
Unha vez rematado o prazo para a presentación de alegacións, Portos de Galicia iniciará as consultas oficiais ás entidades afectadas, entre elas, o Ministerio de Transición Ecolóxica; as consellerías de Presidencia, Sanidade, Medio Ambiente, Cultura e Mar; o Concello de Corcubión; as confrarías de Corcubión, Fisterra e O Pindo; a Federación de Confrarías da Coruña, o club náutico Carrumeiro, Adega; ou as sociedades galegas de Historia Natural e de Ornitoloxía.
O presidente de Portos de Galicia lembrou que o ente público contempla un investimento plurianual de preto de 10 millóns de euros para esta actuación, dos que en 2026 consígnanse 20.000 euros para actuacións preparatorias de cara a, unha vez rematada a tramitación, licitar as obras.
Histórico do proxecto
- Novembro 25: Publicado e posto a información pública o estudo de impacto ambiental do Porto Mixto de Corcubión.
- Setembro 2025: Poucas novidades sobre o estudo de impacto ambiental do Porto Mixto de Corcubión
- Xuño 2025: A Plataforma veciñal unha reunión co presidente de Portos para analizar como está o proxecto do porto mixto de Corcubión.
- Outubro 2024: O PP recoñece no Parlamento que “non vai ser posible que o vindeiro ano estean en execución as obras" do porto mixto de Corcubión.
- Maio 24: O Informe Ambiental xera dúbidas sobre un posible retraso no Porto Mixto de Corcubión.
- Novembro 2023: O mar de Corcubión, pendente dos posibles retrasos do porto mixto.
- Novembro 23: O enésimo barco ás pedras de Santa Isabel.
- Marzo 23: Escollida a alternativa máis viable para o porto mixto de Corcubión.
- Febreiro 23: Portos pon un horizonte de 4 anos para que o porto mixto de Corcubión poida ser unha realidade
- Xaneiro 23: Volven pedir a recuperación do práctico e o porto mixto de Corcubión.
- Decembro 22: A Xunta sobre o Porto Mixto de Corcubión: “Vai para largo”.
- Decembro 22: A Plataforma apartidista “Portos Si, Mortos Non” acentúa a súa loita polo porto mixto de Corcubión.
- Outubro 22: Crean a Plataforma "Porto si, Mortos non" para esixir o porto mixto de Corcubión.
- Decembro 20: A Conselleira do Mar esquécese das promesas feitas en xullo sobre o porto mixto de Corcubión.
- Xullo 2020: A Xunta expón un estudo con distintas alternativas para mellorar o abrigo no peirao de Corcubión.
- Setembro 2019: Corcubión espera a aprobación do porto mixto.
- 2017: O PSdG pide melloras no peirao e retomar o proxecto do Porto Deportivo de Corcubión.
- 2018: “O sector náutico aínda ten moito que crecer na Costa da Morte”.
- 2011: O PP de Corcubión promete o Porto Deportivo se asume o goberno.
Sucesos no peirao
- Novembro 25: Outro barco ás pedras de Santa Isabel.
- Novembro 23: O enésimo barco ás pedras de Santa Isabel.
- Novembro 2022: Outro barco de Corcubión acaba nas pedras.
- Outubro 2019: Outra embarcación ás pedras de Santa Isabel.
- Xuño 2019: A #BorrascaMiguel mandou unha lancha ás pedras de Santa Isabel.
- Maio 2019: Outro barco ás rochas de Santa Isabel.
- 2016: Afunde unha embarcación no porto de Corcubión.
- 2011: Rescatan un barco de pesca que varou en Corcubión polo temporal.