Poucas novidades sobre o estudo de impacto ambiental do Porto Mixto de Corcubión

mar portos porto mixto

Remolcando unha embarcacion no porto de Santa Isabel — Imaxe dun suceso dunha embarcación que acabou nas pedras da Santa Isabel

Poucas novidades sobre o estudo de impacto ambiental do Porto Mixto de Corcubión

07:45 18/09/25

Segue estancado o proxecto do Porto Mixto de Corcubión. Xa case vai un ano dende que o PP recoñecía no Parlamento que “non vai ser posible que o vindeiro ano estean en execución as obras", pero é que chegando a final de 2025, cun novo inverno moi preto, nin a Plataforma veciñal Portos Si, Mortos Non, nin o Concello de Corcubión saben algo sobre o estado do estudio de impacto ambiental. Un estudio foi anunciado hai ano e medio no DOG.

Ante esta situación, é o deputado do BNG pola Costa da Morte, Oscar Insua, o que vén de presentar diversas iniciativas no Parlamento galego para reclamar á Xunta de Galiza que remate o estudo de impacto ambiental do Porto Mixto de Corcubión “á maior brevidade posible,” e a sometelo a información pública e consultas ás administracións públicas afectadas este mesmo ano, así como incluír nos vindeiros orzamentos autonómicos unha partida con dotación suficiente para licitalo e iniciar a súa execución.

Dende a "Plataforma veciñal Portos Si, Mortos Non" lamentan non ter novidades dende que en xuño pediran unha reunión co presidente de Portos, e van enviar unha nova petición con copia á Consellería de Mar e ao Presidente da Xunta.

Pola súa parte, dende o PP local aseguran que o estudio está en marcha, e que se atopa na área de Patrimonio, quedando pendente a anaálise de Transición Ecolóxica, se ben este mes haberá máis novidades.