Piden unha reunión co presidente de Portos para analizar como está o proxecto do porto mixto de Corcubión

proxecto Porto Mixto Corcubion — Imaxe do proxecto do porto mixto de Corcubión

Piden unha reunión co presidente de Portos para analizar como está o proxecto do porto mixto de Corcubión

08:06 11/06/25

O porto mixto de Corcubión segue a estela da Autovía da Costa da Morte. Pasan os anos e nada se sabe del. As promesas esvaécense co vento do nordés, pasan as partidas orzamentarias e os proxectos segue quedando no caixón. E veremos se non acontece como ca Autovía, que pasou a Corredor, e o porto mixto non se convirte noutro pequeno pantalán.

Porque falamos dun proxecto que era proposto polo goberno socialista local en 2009, que intentou recuperar o tamén goberno socialista en 2017, pero que foi sendo esquecido continuamente a pesar dos innumerables sucesos invernais que acabaron con ducias de embarcacións nas pedras de Santa Isabel.

A pesar das peticións do sector náutico e da creación en 2022 da Plataforma "Porto si, Mortos non”, a ;Xunta xa avisaba de “ía para longo”, chegando a poñer en 2023 como prazo de execución o 2027.

Pero non tardaron en chegar os atrancos, xurdidos das sospeitas do informe ambiental. Un informe ambiental que Portos quería realizar de forma simplificada, pero que terá que ser ordinario, como é normal, como deixou claro a Dirección General de Calidad Ambiental, Sostenibilidad y Cambio Climático. Este e outros estamentos do goberno central trasladaron a Portos de Galicia varias suxerencias, modificacións e melloras ao proxecto presentado.

Pero como esta foi información trasladada a través da prensa, dende a “Plataforma Portos si, mortos non”, 9 meses despois da última reunión, quere coñecer de primeira man en que fase se atopa o proxecto. Por iso veñen de solicitar unha reunión co Presidente de Portosd e Galicia, José Antonio Álvarez Vidal, para avaliar aconxuntament o estado da xestión sobre o impacto ambiental.

Así mesmo, e dado que o próximo 1 de xullo, a Xunta de Galicia asumirá competencias en materia de ordenación e xestión do litoral galego, a entidade quere saber tamén se este traspaso terá algunha repercusión no proxecto do porto mixto de Corcubión.