Continúan en loita os pais afectados pola non escolarización dos seus fillos

Costa da Morte carballo

09:26 18/05/15

Os pais afectados pola non escolarizacion dos nenos no CEIP Fogar

Seguen as 30 familias afectadas pola falta de prazas escolares para os seus fillos de 3 anos en Carballo, con mobilizacións. A plataforma de afectados pola falta de prazas no Fogar decidía a semana pasada continuar coas súas reivindicacións buscando unha solución que podería pasar por habilitar unha cuarta aula no Fogar ou unha segunda aula no colexio Mirón de Bértoa Unha situación que deixa moi tristes a estes pais, que vén con preocupación non poder escolarizar aos seus fillos tendo un centro a 50 metros.

Os pais afectados pola non escolarizacion no Fogar na festa das letras de Carballo

Así, os pais aproveitaron varios actos do 17 de maio, aos actos do Día das Letras Galegas, para amosar, na Praza do Concello, o seu descontento co BNG, con Evencio Ferrero á cabeza, pola súa falta de Dilixencia en intentar resolver un problema que se produce desde fai máis de 10 anos.
E para loitar en todas as frontes, tamén se achegaron a Bertoa, xa que alí ás 20:00 horas tiña o mitin o Partido Popular, partido que agora mesmo goberna na Xunta e que se nega a abrir unha cuarta unidade en Fogar ou unha segunda en Mirón. Falaron con Miguel Ferreiro, e alí comprometeuse a falar co Conselleiro de Educación na Xunta, para intentar solucionar o problema.

Os pais afectados pola non escolarizacion dos seus nenos no mitin do PP

”Non houbo previsión”

”É evidente que non houbo previsión da poboación que había que escolarizar na zona do Fogar”, recoñecen os pais, tal e como se puido comprobar na oferta inicial de prazas (44+6 de necesidades especiais) para 101 solicitudes. “Cando nunha vila como Carballo hai 30 familias que non poden levar aos seus fillos ao colexio da súa zona, as cousas non se deben de estar facendo moi ben dende as autoridades competentes”, denuncian os afectados.

Sen respostas ás demanadas

Polo de pronto, as respostas das administracións negándose a dar unha destas solucións non son convincentes. Cada semana, estes pais atópanse coas mesmas respostas, xa que tanto Concello como Consellería admiten que existe un problema co mapa escolar en Carballo, que provoca que nenos de zonas próximas aos colexios quédense sen praza, e outros moito máis afastados téñanse que desprazar a colexios que aparentemente son máis atractivos.
De xeito que se producen desprazamentos innecesarios dunha zona a outra de Carballo, e mentres un colexio está ata arriba, hai outro que apenas ten actividade.
Pero… “a culpa é dos pais ou dos seus nenos? Por que a falta de previsión de Concello e Consellería ten que afectar todos os anos a decenas de familias?”, pregúntanse os afectados.

As explicacións

No caso do Fogar, a razón esgrimida pola Consellería é a masificación do centro. Respecto a isto, os representantes da plataforma que se reuniron co inspector e xefe territorial argumentaron e demostraron con datos que a curto e medio prazo non se incrementaría a masificación do colexio debido a dúas razóns fundamentais:
- Partindo dunha boa planificación e reorganización das zonas de escolarización dos centros de primaria de Carballo por parte das autoridades competentes, e cos datos do alumnado que entraría en 4º de infantil o curso 2016-17, é moi probable que na escola Fogar sexan suficientes dúas aulas dentro de dous cursos. Isto compensaría a creación da cuarta aula para o vindeiro curso.
- Tendo en conta os alumnos de 4º, 5º e 6º de primaria que van ir saíndo do Fogar os próximos anos, non aumentaría a masificación do centro. Ademais, hai que engadir o feito de que existen precedentes de habilitar catro aulas de 4º de infantil no Fogar, o último no ano 2009.

No caso Mirón a solución que solventaría os problemas á 30 pais de Carballo sería tan sinxela como dotar dun noco profesor. Ademais de que tamén hai precedentes de habilitar unha segunda aula, o alcalde comprometeuse a enviar nos próximos días unha carta á Consellería apoiando esta solución, xa que por parte do Concello xa se ten habilitada esta segunda aula e lista para usarse.
Díxose ademais que non se podería abrir esa segunda aula pola imposibilidade de celebrar as Festas de Bértoa, pero os pais aseguran que os veciños de Bértoa non teñen problema, e mesmo estarían dispostos a ceder o local social para que se puidese realizar gimnasia en días de choiva aos nenos. A verdade, só faltaría que se argumentasen asuntos de festas ante a escolarización.

Ao final, veremos que pasa, porque sen dúbida moitas familias non escolarizarían aos seus fillos este ano si non se lles dá unha solución, xa que probarían sorte o ano próximo, para non estar condenados a desprazamentos durante os próximos 9 anos.