Venres. 29.03.2024
El tiempo

“O ritmo acelerado da Xunta na implantación de eólicos é proporcional á degradación que sofren os chans"

branas ou turbeiras en galicia ameazas
As brañas e as turbeiras son fundamentais para o mantemento do chan
“O ritmo acelerado da Xunta na implantación de eólicos é proporcional á degradación que sofren os chans"

Cando a Xunta xa fala de “Complexo Eólico Costa da Morte” é que a cousa vai en serio. Así o denuncian varias entidades medioambientais como a Plataforma Quijote de Outes, a Asociación Petón do Lobo, a Plataforma contra os eólicos das Salgueiras en Ponteceso e a Plataforma de veciños O Cerqueiral en Coristanco. “Centos de hectáreas de chans ameazados pola desertización tras a implantación de eólicos en terras fértiles e humidais en boa parte do territorio galego”, lamentan.

As entidades piden á Xunta que “avalíe as consecuencias que a implantación masiva de eólicos está a ter na erosión dos chans e a perda produtiva destes”.

As entidades alertan do novo impulso eólico que propón 39 novos proxectos na Costa da Morte, e poñen o foco en proxectos como o de Banzas e Maragouto, en Outes e Mazaricos, que se asentan sobre turbeiras, brañas, humidais e terras de alta capacidade agrícola.

Lembran que “o chan é un recurso natural non renovable cuxo proceso de formación tómase centos de anos. Son unha parte fundamental no equilibrio dos ecosistemas: funciona como filtro e amortiguador ao reter substancias, protexe as augas subterráneas e superficiais contra a penetración de axentes nocivos e transforma compostos orgánicos descompoñéndoos ou modificando a súa estrutura conseguindo a mineralización”. Por iso, “a implantación masiva de eólicos sobre os chans de Galicia podería alterar os ciclos bioxeoquímicos dos chans. O ritmo acelerado da Xunta na implantación de eólicos é proporcional á degradación que sofren os chans e isto supón unha ameaza á capacidade deste recurso para satisfacer as necesidades das futuras xeracións”.

Continúan: “A materia orgánica do chan ou humus é fundamental para manter a estrutura do chan, reter a auga necesaria, actuar como reserva nutritiva e imprescindible para manter a produtividade dá terra. Certos usos do chan, como as cimentacións eólicas, poden diminuír de forma drástica o contido de materia orgánica do chan. As remocións de terra que esixe a implantación dun parque eólico non é cuestión baladí e eses chans non se van a recuperar polo que nun futuro teremos grandes áreas desertificadas”.
”Coa implantación das cimentacións dos parques elimínase a materia orgánica dos chans e pérdese a produtividade destes. Non só se produce un cambio de uso. Tamén se produce unha transformación urbanística non amparada legalmente ao quedar os chans erosionados e perder de forma irreversible a súa produtividade orixinaria”.

Informe eólicos

Máis novas eólicos

Comentarios