A Xunta rexeita a proposta de ampliación do dique do porto de Malpica e propón varias alternativas

Martin Seco PSOE Daniel Perez BNG e Begona Freire PP na Comision Pesca Parlamento — Martín Seco (PSOE), Daniel Pérez (BNG) e Begoña Freire (PP) na Comisión de Pesca do Parlamento desta mañá

A Xunta rexeita a proposta de ampliación do dique do porto de Malpica e propón varias alternativas

13:38 14/03/23

Un día antes de pasar pola Comisión 8ª de Pesca do Parlamento de Galicia por sendas preguntas de BNG e PSOE, unha delegación de Portos de Galicia comandada pola presidenta da entidade Susana Leguas, achegouse ao Concello de Malpica para manter unha reunión co Concello e a Confraría.

Unha reunión para explicar as conclusións do estudo experimental que leva facendo o ente público durante os últimos anos, mentres os barcos seguen sufrindo as embestidas do mar cada vez que entran e saen na dársena, 5 anos despois do pasamento do patrón do Silvosa.

Portos quixo explicar a necesidade de ter tomado datos durante tanto tempo, destacando “a exposición extrema da dársena, propiciando un efecto de resonancia” impropia da costa atlántica.

Leguas asegura que analizaron varias opcións:

Ampliación do dique,
A prolongación do actual martelo,
A construción dun novo martelo enfrontado ao existente,
A modificacións da xeometría da dársena interior e implantación dunha comporta maior.

Sen dar unha resposta concreta, sinalou que formulan a necesidade de facer un dragado, e de buscando a instalación dunha comporta máis ancha, nunha nova localización.

O patrón maior, Pedro Pérez, pediu que se actuase.

No Parlamento

Foi o voceiro de Pesca do PSOE Martín Seco o que levou a proposición non de lei que propuña a semana pasada o candidato socialista á alcadía de Malpica, Walter Pardo, de ampliar o dique uns 200 metros. Seco argumentou a proposta en clave de sehguridade, pero tamén en clave económica, propoñendo crear “unha instalación de referencia para o sector da pesca, unha solución que acabaría cos problemas de seguridade e lle daría impulso á actividade económica do dito porto, que é esencial para o futuro da vila de Malpica”.

Se previamente a presidenta de Portos si que pasou a resumir a reunión de onte, a voceira de Pesca do PP, Begoña Freire aseguraba que “a proposta de ampliación do dique non só non reduciría o problema da comporta senón que podería aumentar o risco de máis correntes na comporta”. Si que avanzou a súa intención de darlle cara adiante a outras alternativas, asegurando que pronto se porían a traballar na redacción do proxecto, a Declaración ambiental e a redacción definitiva para a licitación.
De calquera xeito, a proposta socialista saíu rexeitada polos 7 votos en contra do PP e os 5 a favor de PSOE e BNG.

Seco pediulle a Xunta “actuar con celeridade” e criticou que apenas haia unha partida 25.000 euros nos Orzamentos da Xunta de 2023 para este asunto.

Pola súa parte, algo máis satisfeito polos anuncios amosouse Daniel Pérez, do BNG, poñendo en valor que se dan “froito da insistencia do BNG en sede parlamentar”. Lamentou, en calquera caso que “só queden en anuncios de liñas de actuación”, e criticou a labor de "oposición da oposición" que fai o PP con este asunto, e acusou este anuncio de ser unha nova promesa electoral, "das que tanto sabemos na Costa da Morte". Sobre a suposta "casualidade" da reunión de onte de Portos e a cita da Comisión, Pérez lembrouque o propio alcalde popular asegurou nun pleno do pasado xullo, hai 7 meses, a Xunta xa tiña listos os datos dos estudos experimentais.

Poden ver a Comisión na Mediateca do Parlamento Galego nesta ligazón.