O PSOE critica a mísera partida dos Orzamentos da Xunta para a seguridade na dársena de Malpica

O PP e Portos de Galicia esíxenlle á Confraría que regularice a concesión dos seus edificios e o pósito critica o exceso de burocracia

mar porto seguridade

Martín Seco Walter Pardo porto Malpica — Imaxe dunha visita socialista ao peirao malpicán

O PSOE critica a mísera partida dos Orzamentos da Xunta para a seguridade na dársena de Malpica

10:50 30/11/22

Xa calificou o voceiro socialista local Walter Pardo como “esmola” a partida de 25.776 euros para a mellora da seguridade na dársena que a Xunta incluíu nos Orzamentos de 2023. Onte, foi a portavoz de Pesca do Grupo Socialista, Patricia Otero, a que trasladou á Comisión de Pesca do Parlamento Galego o malestar malpicán ante o que consideran “un insulto” á veciñanza e aos mariñeiros.

Otero lembrou o fatídico accidente de 2018 no que falecía o patrón do Silvosa, dando conta de que xa van 4 anos “dando largas” a pesar das continuas peticións da oposición e mesmo das familias dos mariñeiros. O certo é que malia que hai xusto un ano Parlamento acordaba, por unanimidade, afrontar as actuacións de seguridade do porto de Malpica, neste 2022 non se realizou ningunha actuación, e dende a Consellería aseguran seguir cos estudos experimentais das mareas.

Ademais, sinalou que o goberno galego non destina un só euro á mellora das instalacións do edificio da Lonxa e da nave de redeiras, para resolver os problemas coa cuberta, a construción de aseos ou o portalón de peche. Otero considera “necesario e de xustiza” que estas traballadoras conten cunhas instalacións dignas nas que traballar, “onde non chova nin morran de frío” e que poidan contar con “duchas e baños decentes”.

Regularización na Confraría

Mentres, o grupo popular o que pedía onte na Comisión era que a Confraría de Pescadores de Malpica realizase a regularización dos seus edificios. Rubén Lorenzo sinala que Portos de Galicia “xa realizou múltiples requirimentos para emendar a falta de título concesional na que se atopan o edificio da lonxa e a fábrica de xeo”.

Dende o pósito critican o exceso de “burocracia”, pero sinalan que “están en trámite as concesións pero como se soe dicir a burocracia é lenta, dificultosa e con mil papeis”. Critican de feito que hai polo menos unha persoa que leva máis dun ano con trámites en Portos para montar un negocio no porto malpicán pero as trabas son enormes. Algo semellante que pasa coas concesións das casetas porturarias que hai a carón do lado da depuradora, que sacaron o concurso hai case un ano e aínda non se resolveu.