Promoción 3ª: Os penaltis dan o pase ao Seaia fronte a un gran Ameixenda

Promoción 3ª: Os penaltis dan o pase ao Seaia fronte a un gran Ameixenda

20:00 11/05/14

A Clínica Fisioterapia Sar patrocina a 3ª Autonómica- Coñéce as nosas ofertas en depilación laser

Menudo ambiente no San Paio de Refoxos que volve poñer a proba o potencial do Fútbol da Costa. Máis de 600 persoas encheron o campo no que xogan equipos de maior categoría, pero o que está a acontencer nesta 3ª Autonómica é para estudiar. O pobo enteiro de Seaia, como fixera o de Ameixenda a semana pasada, desprazouse ata Cee para encher de azul, e combater o amarelo, a cor local. E o resultado foi unha fermosa loita cromática, na que o azul saiu gañador, por penaltis.

O Seaia, no seu primeiro ano como equipo Federado, conseguiu un case nin soñado ascenso, a costa dun Ameixenda, na súa segunda temporada en competición, que si que este curso o prantexaba como o do salto. Como dicimos, a agonía foi a protagonista, e só os 11 metros decidiron o ascenso.

Ambientazo no San Paio de Refoxos-Foto-Jorge Parri

Ameixenda - Seaia (1-1)

11 do Ameixenda polo ascenso-Foto-Jorge Parri

AMEIXENDA: Óscar Riolo, Iván Pequeño, Bruno, Camacho, Samuel, Álex, Jesús, Bichiño, Borja, Momaño (jorge, min.70) e Rioliño (David, min.75).

11 do Sporting Seaia do ascenso-Foto-Jorge Parri

SEAIA: Jesús, Lesi, Ramón, Vistas, Eme, Adra, Dimaga, Uru, Camilo, Juni (Parga) e Richard (Medros).
Goles: 0-1, min.44: Camilo nun golazo dende o borde da área tras unha fermosa xogada individual; 1-1, min.83: Álex.
Expulsión: o míster ceense Sieso na primeira parte; e ao ceense Mateo estando no banquillo o comezo da segunda.
Penaltis: Chegouse ao 11º penalti, e o erro do meta ceense Óscar Riolo, fixo que o transformado por Uru dera o pase aos malpicáns.

Capis do Seaia e Ameixenda-Foto-Jorge Parri

Menudo partido o vivido en Cee. Dous equipos que o deron todo, dous equipos que pelexaron ata o final e só a sorte dos penaltis decidiu un máis que soñado ascenso. Tralo 1-1 dunha ida chea de nervos e respecto, todo estaba aberto.

Arrincaba o choque cun rato de dominio para cada equipo, pero sen demasiada claridade. O Ameixenda tomaba o mando, pero non chegaba con demasiada claridade. Pero cirría o min.44 da primeira e Camilo collía o balón, regateaba a un par de rivais e facía o 0-1 cun golazo dende fóra da área.

A volta do descanso o Ameixenda tomou o mando. Un punto mellor fisicamente, os ceenses fixéronse co partido, pero o Seaia defendíase moi ben, e non permitía ocasións claras. Só, cando faltaban 7 minutos, Álex, un dos xogadores máis completos da categoría, cazaba un balón e facía un empate que deixaba a eliminatoria igualada.

Remataba os 90 minutos e chegaba a polémica. O colexiado asegurara ao comezar que habería prórroga de queda empate a 1, como na ida. Pero unha vez colleitado o resultado, o colexiado decatouse que a orde da Promoción indicaba que se iría directamente aos penaltis. O Ameixenda, que chegaba moito máis forte a esa hipótica prórroga, protestou, pero a rolda de penaltis estaba encamiñada.

A tensión invadía o estadio, e o silencio dos momentos antes de chutar contrarrestaban cos berros ao marcar ou parar. Así, nada menos, que ata o 11º penalti. O Seaia tiraba primeiro, e Uru non fallaba. Era o turno do porteiro do Ameixenda, Óscar Riolo, un clásico do fútbol costeiro. Xa parara dous penas máximas que os seus compañeiros non foron quen de aproveitar, pero o seu tiro ía fóra, e o Seaia se metía na 2ª Autonómica.

Oscar Riolo parando un penalti-Foto-Jorge Parri

A festa malpicá trasladouse a Cee, e a parroquia amarela só puido lamentarse entre bágoas. Enviamos os meirandes parabéns a toda a familia do Seaia por este merecido ascenso, e outros tantos á familia do Ameixenda, un equipo novo pero cun futuro tremendamente prometedor, cun compromiso fantástico, que veñen de facer unha grande temporada e que o ascenso terá que ser un claro obxectivo para o ano que vén, máis con esta afección.