Descubrindo petróglifos con Suso Lista

Petroglifos da Fieiteira en Corme con Suso Lista — Petroglifos da Fieiteira en Corme

Descubrindo petróglifos con Suso Lista

11:41 17/08/23

Poucos mellor que Suso Lista para contar as maraabillas do seu Corme natal. A través da Asociación Insua de Viastela, e da man da súa marca 7Faros está ofrecendo unha serie visitas guiadas gratuitas (si acepta a vontade de quen queira colaborar cun donativo) de 4 rutas singulares que nacen da Fonte do Campo: un paseo histórico por Corme (el é un amante da historia e natural de Corme); unha escapada nocturna aos petroglifos da vila (é descubridor de moitos dos petroglifos hoxe catalogados, unha saída ao Mirador da Ghurita a ver os 7 faros, e un solpor polo Roncudo contando a historia do percebe (é percebeiro).

Montamos no vagón dos petroglifos un xoves de agosto, cun diverso grupo que ademais dunha familia da Mata, leva unha veciña de toda a vida que quere o patrimonio da súa vila, unha parella de veciños da comarca, 4 indonesios que traballan no mar e viven na vila dende hai tempo, e unha familia de vascos que pasan os verán no lugar.

Ruta de caminantes aos petroglifos con Suso Lisrta — Equipo de descubridores

Petroglifos da Regadina con Suso Lista — Suso Lista nos petrogifos da Regadiña

Antes de saír da vila, paramos na rúa máis estreita do mundo, un dos puntos singulares da ruta do Corme histórico. Saíndo xa da vila paramos nos petroglifos da Regadiña, un dos amosados polo propio Suso coa colaboración do Colectivo A Rula. Ao carón dunha placa informativa aboslutamente esfolada, podemos ver, aínda coa luz do día, varias cruces inscritas en círculos, no que apenas é un aperitivo do que vén.

Estado do panel dos petroglifos da Regadiña

Seguimos andando cara o cumio, e de camiño, facemos parada nun curioso gravado do século XIX, dun burro que agocha unha historia familiar moi especial, que o propio Suso axudou a compoñer.

Continuamos a subida, xa de noite pechada, cara os Petroglifos da Fieiteira. Primeiro ofrece unha explicación da situación de dominancia territorial que ofrece o outeiro ofrecendo unha panorámica da ría de Corme e Laxe, coa vila veciña de fronte, e cun ceo absolutamente espectacular (non cazamos a noite na que ademais de petrogilfos tamén disfrutaron da chuvia das bágoas de San Lorenzo).

E comeza o espectáculo. Armado con apenas unha linterniña, comeza a desglosar os tesouros do conxunto máis complexo e máis relevante do Concello, e como definen na Rula, “maior concentración de gravados localizados ata agora na Costa da Morte”. Ata 15 paneis cubertos de debuxos de todo tipo: “ruces inscritas en círculos, escaleiriformes, ferraduras, círculos simples, “vermiformes” (óvalos alongados e divididos por liñas transversais), reticulados, etc.”.

Unha verdadeira marabilla que deixa a vascos, bergantiñáns e indonesios coa boca aberta.