A emancipación da mocidade

07:50 08/04/24

Na sociedade actual, atopámonos cunha realidade na que unha gran parte da mocidade enfronta dificultades á hora de independizarse. Este fenómeno non é exclusivo dunha rexión ou país, senón que afecta a moitas comunidades e, Galicia non é unha excepción. A falta de independencia económica é a dificultade para acceder as vivendas son dous dos principais obstáculos que a rapazada debe superar para lograr a súa emancipación.

Entre as persoas de 16 a 29 anos, só un 16% pode vivir con plena liberdade. Estas son as mellores cifras rexistradas dende 2020, pero a media non deixa de ser de 30,3 anos. Ante estes alarmantes datos podémonos preguntar por que sucede isto.

En primeiro lugar, a situación económica xeral, tanto a nivel global como local, xoga un papel crucial na capacidade dos mozos para vivir de xeito independente. O mercado laboral presenta desafíos, cunha alta taxa de desemprego ou con ofertas de traballo que non cobren as necesidades económicas básicas.

Ademais, o acceso a una vivenda adecuada é un dos maiores obstáculos que se deben afrontar para vivir por conta propia. O mercado inmobiliario presenta prezos elevados, o que fai que unha gran parte dos mozos non poidan permitirse a compra ou alugamento dunha vivenda.

Outros factores importantes son a crise sanitaria, a guerra de Ucraína e, máis recentemente, a seca en España; que provocaron a suba de prezo dos produtos, a pesar de que o salario se mantivo igualado.

Neste contexto é esencial que o Estado tome medidas, como proporcionar certas axudas económicas, así como promover o emprego estable e ben remunerado.

En resumo, a falta de recursos económicos, o acceso limitado ás vivendas e os factores que condicionan a economía española son obstáculos importantes, que requiren compromiso por parte do Estado, e que promoven o desenvolvemento da sociedade.