O Carballo Interplay achégase a Carballo apostando polo talento galego

Cultura premios festival internet Carballo Interplay webseries

Foto de Familia do Carballo Interplay 2024

O Carballo Interplay achégase a Carballo apostando polo talento galego

22:03 07/04/24

Rematou a XI edición do Festival de Contidos Dixitais Carballo Interplay. Unha nova edición que volve colocar a vila bergantiñá como a capital da cultura e creación dixital de todo o país. E máis que a vila, concretamente o Mercado Municipal, que se converteu nun dos axentes con vida propia. Pois do millón de cousas boas que ten o festival, a única pequena pega que se pode sinalar (pero nin sequera acusar) é a falta de implicación do tecido social carballés. E a nova localización no corazón da vila parece que serve para conectar máis coa veciñanza. Moita xente da vila vía movemento no Mercado, subía a curiosear e acababa quedando ou volvendo.
Un bo xeito de comezar o traballo que ten clara a organización para integralo máis na vila, que pasa tamén pola outra gran novidade desta edición: recoñecemento ao talento galego emerxente no ámbito audiovisual e dixital.

Despois das dúas primeiras xornadas nas que o talento galego foi o gran protagonista con varias palestras e sesións riseiras con persoeiros da nosa rede, o sábado e o domingo reservaban os pratos fortes.

O talento galego

prado Rua Mellor Contido Dixital en Galego no Carballo Interplay — Prado Rúa recollendo un dos novos premios

A gala final celebrada na sesión vermú do domingo, arrincou co show “CFA. Lasamigas Productions” da man de Carolina Iglesias e Laura Márquez repasando os seus referentes e inspiracións do mundo audiovisual e dixital. Despois celebrouse a entrega de premios, nun acto cheo de risas presentado polo dúo cómico Izquierdo Sisters.

E como comentamos, unha das grandes novidades foi a aposta polo talento galego, con varios premios.

Así, o Premio a Mellor Creador e Canle de Contido Dixital en Galego, que tivo 10 finalistas tremendas, foi para a creadora de contido María Rúa, coñecida en redes como Prado Rúa, pola súa “autenticidade, carisma especial” destacado a calidade lingüística do seu contido e a “rotundidade” para defender “causas que considera xustas”, a gañadora a mellor creadora.

O Faiado Podcast Mellor Contido Dixital Galego Carballo Interplay — O Faiado Podcast

Ademais, na categoría de Mellor Canle en Galego o gañador foi o videopodcast “O Faiado”, realizado por estudantes da Universidade de Santiago de Compostela, por facer coas súas conversas e entrevistas “do local algo universal e viceversa” e o dominio da comunicación en redes sociais. O premio económico é de 600€ en cada categoría.

E finalmente, o Premio a Mellor Proxecto de Contido Dixital en Galego, os gañadores foron o equipo da serie “Delirio Sketch”, co seu proxecto de serie de comedia. O Carballo Interplay aportará con este recoñecemento 3.000€ destinados á produción da serie, como aconteceu este ano con “A moza que abourtou e o contou”, presentada na xornada do venres.

A webserie gañadora, tamén en galego

Irene Pin ganadora do Premio Carballo Interplay mellor websere — Irene Pin

Das mil actividades que organiza o festival, o certame de webseries é o gran fío condutor. E este ano, por primeira vez na historia do festival un proxecto galego acada o premio a Mellor Dirección. A lucense Irene Pin levouse o galardón, dotado con 200€. A webserie “Rent-a-pal” conta a experiencia de Andrea, unha rapaza que comeza a traballar nun negocio moi singular, unha empresa de alugueiro de amigos.
O xurado, formado pola curadora de contido dixital Ainhoa Marzol, o cineasta Joel Bassaget e o artista Fran Rodríguez Casal destacou a “resistencia a adaptarse a unha estructura narrativa fácil e coñecida para tomarse o seu tempo e peitear coidadosamente os anacos contemporáneos da vida”.

Este xurado tamén otorgou o premio de Mellor Serie a Historia Mal, dirixida polo andaluz Daniel Cervantes, unha obra de animación coa que lle dan unha volta á historia ou como sinalan os autores, “con máis improvisación que historia”. Neste caso o xurado destacouna como “divertida, intelixente e estrafalaria” demostrando que “os cartos non son problema cando se ten talento e coñecemento”. O premio económico neste caso é de 800€.
A serie conquistou tamén ao público que se achegou ao Mercado a coñecela e cos seus votos concedeulle o Premio do Público, de 400€. A webserie Bananas, enviada dende República Checa, recibiu unha mención especial por parte do xurado.

O xurado novo, formado por Afra Torrado, Daniel Valcárcel Colino, Iria Ramos Mesía e o artista Mondra, destacou a webserie china Monster Diner / 怪兽小馆, sobre monstruos agochados entre humanos. Este Premio do Xurado Novo conta con 400€.

Unha de política

Carballo Interplat contidos politicos — Segunda palestra política no sábado do Interplay

Non podemos deixar de recoller a xornada política vivida o sábado, falándose da “nova internet” co activismo e a política como temas centrais con algunhas das voces máis recoñecidas do panorama estatal dixital.

A primeira conversa articulouse sobre a cuestión “E se imprimimos internet?”. Participaron Marina G Canedo, creadora de contido político e do podcast Gente2020; Álvaro L Pajares, profesor, escritor e creador de contido de contas como Policía del Afecto; Rafa López, creador da conta afirmacion.es e un referente no mundo do meme en España e Ainhoa Marzol, comunicadora e curadora das tendencias na rede na súa newsletter Gárgola Digital.

O segundo panel, que levaou por nome “O dixital é político”, e centrouse en como as xeracións X e Z constrúen lazos e traballan alternativas dende o eido dixital.Participaron Iván Iglesias, fundador do medio ourensano OU Ké!; Román Varela, un dos fundadores do podcast galego Carretando; Sergio Gregori, xornalista e director de Furor TV; Ayme, divulgadora de política, feminismos e política social e Marina Lobo, guionista, presentadora e cómica, forma parte do equipo de Spanish Revolution.