Crónica e resultados dunha fin de semana copeira no Fútbol da Costa

Deportes Fútbol da Costa

21:42 18/05/14

Fermosa tarde de fútbol esta na Costa da Morte. Con moitos frontes e moi importantes, como as finalísimas das Copas Xuvenil e Infantil, o comezo dos Oitavos da Copa ou a última xornada na Preferente.

E precisamente, comezamos o repaso pola Preferente, que deixa ao XSC cun pé e medio na 1ª Autonómica. Os xalleiros sumaron un punto que de pouco lles vale, unha vez que O Val caía ante o Bergan, pero esa 14ª posición non lle vale para evitar os arrastres. Terá que esperar e tifar con Viveiro ou co Silva para que algún consiga o ascenso á 3ª División.
Mentres, Dumbría e Soneira despedían a temporada cun derbi pero mantendo as súas liñas. O ano que vén, o Soneira competirá na 1ª Autonómica.

Fin de semana de Copa

A Copa da Costa foi a gran protagonista da fin de semana. E con relativas sorpresas, como a goleada do Corme ao Soneira, dous equipos que se verán o ano que vén as caras na 1ª. Os cormeláns teñen un pé en Cuartos, como o Dumbría, que goleaba ao Buño en Xaviña e tamén encarrilou a eliminatoria. O Malpica, co seu 0-2 en Ara Solis, tamén ten un pé na seguinte rolda, mentres que as Outes-Cee, Baio-Ponteceso e XSC-Ameixenda deixaron todo para a volta. Destacar ese Ameixenda que , despois do varapau da Liga, sacou forzas de flaqueza e apretou a todo un cadro xalleiro.

Tarde de Copas Base en Vimianzo

Acollía o Municipal vimiancés unha fermosa tarde de Copa, coas finais de Xuvenís e Infantís. Doble presencia cormelá, polo que as bancadas tiñan unha tinguida cor azulona. Pero non puideron levantar ningún título a marea cormelá, con dúas derrotas tras facer unha grandísima campaña.

En Infantís foi o Cee, cunha manda de siareiros tamén de azul, o que levou a I Copa da Costa Infantil, tras vencer por un apurado 3-2 ao cadro cormelán. Era favorito o cadro ceense tras gañar a Liga, e non fallou.

De seguido, tocáballe o turno aos Xuvenís. E o Dumbría fixo gala tamén do seu poderío e vencía, apuradamente, a un correoso Corme. Impresionante este Dumbría que por agora leva gañado todo o xogado: liga regular, liga de campións e Copa. Só lles queda pechar o ano cun histórico ascenso á Liga Galega.

Esta semana traeremos as crónicas dos dous partidos.

Ligas Base

E acabou a temporada o Dumbría da División de Honra Cadete, e o fixo na liña deste último treito de liga, caendo. Un equipo que ten feitos os deberes xa dende hai tempo, tras unha primeira volta espectacular competindo cos grandes clubes galegos. O cadro dumbriés remata na 11ª praza.

A que aínda non acaba é a Play Off Descenso da Liga Galega Infantil, na que os nosos sumaron novas derrotas, pero seguen en situacións diferentes. O XSC ten case imposible a salvación mentres que o Dumbría depende de si mesmo nestes 4 últimos partidos que restan.

4 partidos restan tamén para que acaben as Ligas Norte de F8. En Alevíns o Cabana segue líder co Vimianzo pegado, mentres que en Benxamíns é o Sofán o que persegue a un Cabana que domina o norte.

Copa de Veteranos

Arrincaron os Oitavos da Copa dos Veteranos sen demasiado sobresalto. Parece que Soneira, Dumbría e Laxe son os únicos que meteron terra de por medio e se achegan aos Cuartos, pero o resto de eliminatorias seguen igualadas