Auditoría pública fronte ao fraude e a corrupción

07:45 14/12/21

O Día Internacional contra a Corrupción, instituído pola Organización das Nacións Unidas, celébrase cada 9 de decembro. Pero, como en anos anteriores, esa data pasou inadvertida. Tal vez, porque é unha cuestión que non nos preocupa especialmente. De feito, cando se conceden indultos por corrupción pouco ou nada se protesta.

Os que seguen este espazo coñecen a miña defensa da auditoría pública como instrumento eficaz para loitar contra o fraude e a corrupción na xestión dos recursos públicos. Pero tamén defendo a necesidade de realizar cambios na súa configuración actual. Porque a planificación e execución dos traballos coa tradicional metodoloxía fiscalizadora resulta obsoleta.

Falar hoxe de «papeis» de traballo ou de traballo de «campo», por exemplo, carece de sentido. Porque o papel desapareceu coa informática e as visitas físicas aos concellos auditados superáronse coas vídeo conferencias, conexións remotas ou acceso á sede electrónica municipal nesta era do teletraballo. O cambio do nome papeis de traballo por «ficheiros electrónicos» e de traballo de campo por «traballos de execución material», que acabo de acuñar, tan só representan modificacións semánticas.

A cuestión ten máis calado e vai desde un novo enfoque da auditoría, baseado na análise de riscos, a un perfil técnico do auditor máis actual. Deste xeito, os órganos de control externo deben avanzar na xestión electrónica das fiscalizacións e na supervisión de sistemas de prevención e integridade; e os empregados públicos deben ser expertos en auditorías de sistemas de información, porque a transformación dixital obriga a avanzar nese camiño.

Con todo, si queremos festexar o vindeiro Día Internacional contra a Corrupción como se merece, debemos comezar interiorizando conceptos relacionados coa integridade, cos principios e valores fundamentais, exaltando como se merece os comportamentos éticos das persoas e institucións que os practican, porque os hai.