Luns. 03.10.2022
El tiempo

Na esquina Montevideana

A primavera achégase á esquina do “Rover” e as agradables temperaturas axudan ao goce dunhas boas pizzas dacabalo. A barra non é de facer apostas pero confían no retorno da Fronte Ampla. É unha realidade que o actual desgoberno neoliberal lacayista móvese polos seus propios intereses e tamén para aumentar a riqueza dos que máis teñen.

Na esquina Montevideana

- Claudio: O sol primaveral vén moi ben para alegrarnos un pouco despois do frío endémico que temos no corpo pola sucia e persistente campaña de branqueo dos mercenarios mediáticos. Hai moitos cidadáns que queren crer que vivimos no paraíso, aínda que é evidente que cada vez se reduce máis a clase media e aumenta a pobreza a ritmo acelerado.

- Flaco: Creo que o sol axuda aos que non mascan vidro porque vemos caer a cachos esta unión de coimeros pero aos outros quizais lles faga pechar máis os ollos para negar que coa Fronte Ampla tiña máis papas na cociña para o puchero. É incrible que haxa tanto nabo solto. Penso que algún é recuperable pero a maioría seguirá defendendo a quen os despreza.

- Gildo: Na primavera, aos fronteamplistas, vésenos máis animados xa que mantemos a nosa convicción de que a senda correcta é a da solidariedade. Non hai recuperación social se somos egoístas e nos esquecemos dos desfavorecidos pero a dereita gaña eleccións en todo o mundo mediante o incentivo do egoísmo. Quero dicir que xuntan moitos votos co contiño barato de que a ti ninguén che di a quen votar. Sodes libre e elixides ao candidato que vos defende dos que están peor que vós. Algúns lle chaman neoliberalismo pero se cadra é un simple caso máis de odio aos desfavorecidos.

- Don José: Bueno, botijas, vexo que vostedes pensan. A min quédame pouco tempo pero non quero ir ao Cemiterio do Norte sen antes celebrar a volta da Fronte Ampla. Espero aguantar aínda que o virus lacayista está a afectarme un pouco na parte física. Por sorte, a mente, segue gardando intactos os meus ideais de compromiso de loita por unha mellor distribución da riqueza social. Escoitar o que escribín neste papelito: A política é o arte de servirse dos homes facéndolles crer que se lles serve a eles. Díxoo o escritor suízo Louis Dumur [1863-1933] e vén ao xeito para aplicar aos descoloridos votantes que puxeron na presidencia a Lacalle Pou. É unha obviedade pero fago a aclaración de que a definición é incorrecta para os fronteamplistas. A política, para nós, é o instrumento que nos permite mellorar a calidade de vida dos cidadáns.

- Claudio: O que me sorprende é que siga habendo xente que defende ao goberno a pesar de que saben que recibe guita de narcotraficantes e grandes coimas pola privatización de Antel e as escuras concesións no porto de Montevideo. É unha foda constante que lles enche os petos pero parece que están autorizados para afanar o que sexa. Pregúntome que carallo teñen na cabeza os que están de acordo con todas estas actividades delituosas.

- Flaco: Hai que recoñecer o bo laburo da prensa corrupta. Minten, deforman e ocultan para que vexas aos teus como uns santos e aos da Fronte como uns demos. Ademais, a mentalidade clasista do votante de dereita [refírome en particular ao que non ten un mango] acepta unha submisión incondicional ao que está arriba. É un esmoleiro que espera que se o seu amo obtén uns millóns de ganancia (sexa lícita ou ilícita) lle vaian caer unhas chirolas. Recólleas agradecido e manifestando que eses pesos lle pertencen porque non é ningún pichi da Fronte Ampla. Que se pode facer para sacarlle o veleno que levan dentro? Como os curamos?

- Gildo: Estou a pensar na gran estafa que se levou a cabo coa inestimable colaboración do ministerio de Saúde Pública para liquidar a unha histórica mutualista como era a Casa de Galicia. Imaxínanse que sucedese durante a presidencia de Vázquez ou de Mujica? Os mercenarios mediáticos estarían a criticar duramente e dicindo que non houbo arranxo posible porque a coima estaba en deixar ás gaitas sen o seu valioso patrimonio social. Ti viches algunha crítica ao goberno? Planificouse, aproveitando a pandemia, unha ben orquestrada operación delituosa para converter ao “Círculo Católico” nunha gran mutualista. O ministerio e o lercho de Igrexas son os responsables directos do afane pero non se fala máis do tema. A mafia lacayista sabe que son miles de persoas as que se morfan o chamuye de que os gayegos eran malos administradores.

- Don José: É triste que por uns poucos votos chegouse a este presente de incerteza para a maioría da poboación pero non debemos de afrouxar. Confío na unidade dos corazóns solidarios para sacar da pobreza a todos os desfavorecidos. Se nos mantemos firmes poderase gañar na primeira volta. Xa sexa un candidato ou unha candidata; é un de nós ao que se lle encarga a xestión dos fondos públicos. Son da opinión de que a vergoñosa rendición ou axeonllamento de Europa aos intereses especulativos dos donos dos Estados Unidos nos abre os ollos. Confírmase que os gobernos son monicreques das corporacións internacionais (inclúese aos fondos voitre como “BlackRock”) que son os que moven os fíos para convencer ao europeo medio de que aínda que perde ingresos, está moito mellor que un arxentino ou brasileiro ou uruguaio. O que non che din é que en Estados Unidos hai cada vez máis pobres. Son millóns os que hai uns anos eran de clase media. Trátase de instalar a idea de que sodes parte de algo que non se pode delimitar con precisión: a clase media. O engano está pensado para que non te consideres pobre. Así é que no medio mundo se repite a mesma boludez: Teño unha casa! Teño un apartamento! Esta afirmación vai acompañada de que se tes unha propiedade é porque es un vago que non quere laburar. No noso país os vagos son os fronteamplistas e en Arxentina son os que bancan a Cristina e en Brasil son os que bancan a Lula. O intenso labor desinformador dos grandes medios de comunicación non consegue, por sorte, a unanimidade. Así é que sempre podemos contar cos inmunizados para recuperar a sensatez democrática. Necesítase volver ao incentivo público con axeitados orzamentos para educación, sanidade e vivenda social.

 

OUTROS ARTIGOS DENDE LONXE DE MONTEVIDEO

comentarios