As traballadoras do Consorcio informan sobre a folga nas escolas de Bergantiños e Soneira
Continúa en marcha a folga das traballadoras das Escolas Infantís e os Centros de Día dependentes do Consorcio de Igualdade e Benestar. Unha folga á que se ven obrigada ducias de traballadoras tamén na comarca (das Galiñas Azuis de Camariñas, Fisterra, Mazaricos, Zas, Muxía, Muros e Carnota, ademáis do centro de día de Muros), despois da “discriminación que pretenden facer no proceso de "estabilización" do persoal do Consorcio, sen un proceso aparte da Xunta, sen identificación de prazas, sen puntuar máis o tempo traballado no posto a estabilizar…” A mesma Xunta que leva permitindo case 3 lustros que as traballadoras ocupen cun contrato temporal postos de traballo que deberían ser fixos, quere agora estabilizalos sen ofrecerlles prioridade.
A pasada semana, as traballadoras formaron comandos nas 4 provincias, de piquetes informativos cara as compañeiras, visitas aos centros, inspección dos servizos mínimos, e incluso cortes de rúa e manifestacións.
Mentres continúan detrás da axenda política, "acompañando" a Rueda, aos delegados territoriais, alcaldes/as,... nos diferentes actos. “Unhas veces, por algúns, fomos escoitadas, e outras, solo oídas, bueno, sempre, porque facemos moito barullo, a verdade”, explícannos as traballadoras. “O presidente non se parou a falar connosco, e o xerente do Consorcio, segue declarándose incompetente en temas de persoal, cousa que non se entende”, lamenta.
Precisamente, se hoxe martes visitan Carnota e Muros, este luns os piquetes estiveron pola zona de Bergantiños e Soneira informando ás traballadoras e ás cansadas familias da necesidade de continuar con esta incómoda folga. Recoñecen que houbo certos problemas para abrir as portas en escolas como as de Cabana, ou Malpica. Tamén estiveron en Zas, na recén reaberta escola, mantendo unha reunión co alcalde, Lolo Muíño, que lles amosou o seu apoio.
Este é o comunicado que enviaba esta mañá o Consorciogalegoenloita.
Notas A4
13·09·2022- Comunicado da Sección Sindical da CNT no Consorcio de IeB da Xunta
Levamos pouco máis dunha semana de protestas e desde o comité de folga da CNT estamos a ver como a intranquilidade das traballadoras e das familias vai en aumento. Todos os días chegan cartas de apoio nas que, comprendendo a nosa situación, piden que abran os centros. Hoxe mesmo unha nai de Sada nos facía chegar a súa preocupación ante a imposibilidade de deixar a súa nena na escola.
O número de escolas infantís e centros de maiores que non poden abrir as súas portas ou que non poden traballar por falta de acceso a internet vai en aumento cada día, a escalada é imparable. Entendemos perfectamente a desesperación das traballadoras, que se xogan o seu sustento, e que se ven abocadas a unha folga cun 90% de servizos mínimos.
Tras máis dunha semana perseguindo aos cargos públicos para que alguén as escoite ninguén quere facerse responsable, sentirse invisible é a peor das leñas para un lume que non queren apagar. Lembramos que as traballadoras do Consorcio están deixando de cobrar os días de folga loitando pola xustiza e a dignidade. Aínda así pedimos calma ¿a quen lle pedimos calma?
Dende o comité pedimos tranquilidade, estamos seguras de que ninguén desexa esta situación e informamos de que acabamos de enviar un escrito a Alfonso Rueda e a Fabiola García para dialogar esta mesma semana, xa que o Xerente do Consorcio, Perfecto Rodríguez, xa nos informou de que non ten competencias para arranxar nada.
Lembramos que a folga a convoca a CNT, e que a negociación para desconvocar debe ser con este sindicato, nada poden facer os sindicatos da Mesa Xeral. Na CNT non cremos no sindicalismo con liberados, cremos na capacidade das seccións sindicais, formadas exclusivamente por traballadoras , para decidir por si mesmas que é o mellor.
Dende o anarcosindicalismo non creemos nas eleccións sindicais, por iso non participamos en órganos como a Mesa Xeral, na que os sindicatos compran subvencións e vender traballadoras, e así se deben aos poderes políticos e non aos intereses dos traballadores e traballadoras.
Isto non nos impide negociar. Fabiola García, Jacobo Rey, Perfecto Muiños, Alfonso Rueda... para desconvocar a folga a única solución é falar coa Sección Sindical da CNT no Consorcio de IeB, nós convocamos, nós desconvocamos.
Moitas grazas pola atención e desculpen as molestias
NOVAS DO CONFLITO LABORAL
- Setembro 22: As familias afectadas pola folga das traballadoras do Consorcio: “Non podemos máis”.
- Agosto 22: As Galiñas Azuis da Costa da Morte e o Centro de Día de Muros veranse afectadas pola folga das traballadoras do Consorcio.
- Agosto 22: As 11 Galiñas Azuis da Costa e o Centro de Día de Muros, afectados pola folga do Consorcio.
- Xuño 22: Nova xornada de protestas das traballadoras esquecidas polo Consorcio de Igualdade e Benestar.
- Xuño 22: As traballadoras do Consorcio continúan a loita polas súas prazas cunha nova folga.
- Marzo 22: As traballadoras da residencia DomusVi de Carballo mobilízanse para reclamar un convenio digno.
- Setembro 21: As traballadoras do Consorcio desconvocan a folga tras conseguir abrir unha negociación de boa fe.
- 30-07-2021: As traballadoras do Consorcio volverán á folga en setembro se non se paraliza a OPE.
- Xuño 21: O TSXG emite unha sentenza sinalando que a Xunta incorre en fraude cos interinos de longa duración.
- 11-05-21: O Consorcio IeB segue sen negociar a pesar das sentenzas que determinan a fixeza de moitas traballadoras.
- 13-04-21: As traballadoras do Consorcio levan as súas demandas laborais ao Parlamento Galego noutra xornada de folga.
- 18-03-2021: As traballadoras do Consorcio endurecen a folga e refrendan o apoio da veciñanza.
- 04-03-2021: As traballadoras do Consorcio endurecen a folga.
- 25-02-2021: Usuari@s dos Centros de Día e as Escolas Infantís amosan o seu apoio á folga das traballadoras.
- 19-02-2021: As traballadoras temporais do Consorcio valoran moi positivamente a folga a pesar dos servizos mínimos abusivos.
- Febreiro 21: Ducias de profesionais dos Centros de Día e Escoliñas da comarca póñense en folga.
