Mércores. 18.05.2022
El tiempo

Contramínate trasladou a preocupación pola ameaza que os eólicos e a macrogranxa supoñen para os Penedos

Penedos Traba e Pasarela-Tiburón ou Man copia
Contramínate trasladou a preocupación pola ameaza que os eólicos e a macrogranxa supoñen para os Penedos

Convocaba a Xunta este pasado venres unha Xornada de Participación sobre o Plan de Xestión da Paisaxe Protexida Penedos de Traba e Pasarela no Salón de Plenos do Concello de Laxe. Sen apenas presencia municipal (só estivo a concelleira de Cultura para presentar o acto e marchar), non faltaba á cita á Asociación Ambiental Contramínate que, entre outros presentes, fixo unha serie de recomendacións:

”Consideramos os Penedos de Pasarela e Traba, así como as terras e paisaxes que conforman dita unidade paisaxística, isto é, o val de Traba e o val de Aplazadoiro, están seriamente ameazados por dous proxectos empresariais tremendamente agresivos coa súa integridade:
- Tras Parques Eólicos: Monte Chan, Pena dos Mouros e Soesto, promovidos por EDP Renovables España, S.L.U. e Naturgy.
- Unha macrogranxa no lugar de Señoráns -Vimianzo promovida por Ganadería Os Loureiros SL”.

Xa explicaran nas alegacións presentadas no seu día en relación ao impacto ambiental, e aseguran que non existen razóns para consideralos de interese xeral, “máis ben privado, causando danos irreversibles nas comunidades afectadas”.

Ademais, amosaron as súas dúbidas sobre a idoneidade de crear 2 aparcamentos na zona dos Penedos polo que solicitan que tanto os Concellos de Laxe e Vimianzo como a Consellería de Medio Ambiente “consideren incompatible a defensa e protección da paisaxe coa presenza de parques eólicos e de macrogranxas na contorna dos Penedos de Pasarela e Traba.”

NOVAS SOBRE OS PENEDOS DE TRABA E PASARELA

comentarios