COVID: Mantense a tendencia á baixa á espera dos resultados dos cribados da Laracha, Camariñas e Vimianzo

3 novos falecidos esta pasada fin de semana nas residencias da comarca

Evolucion Covid 07-02-2021 Costa da Morte — Gráfica da evolución do coronavirus nas comarcas da Costa da Morte dende novembro

12:03 08/02/21

Esta fin de semana realizouse un exitoso cribado masivo no Concello da Laracha. Existoso en termos de participación, pois recollerónse 4.632 tubos coas mostras de saliva, o que representa unha participación do 85% das persoas que foran citadas para realizar a proba.

Segue faltando unha cousa importante: a análise dos resultados. Aínda non temos resultados, e nestes casos a rapidez é fundamental para que o virus non se siga espallando. Pero é que aínda seguimos esperando polos resultados do cribado realizado a semana do 20 de xaneiro en Camariñas e Vimianzo, para o que foron citadas 6.000 persoas.

Tendencia á baixa

Se ben noutras zonas de Galicia parece que a incidencia volve subir, na comarca a tendencia segue á baixa. Cos datos do 7 de febreiro (actualizados na mañá do 8 no portal de transparencia da Xunta), son 791 novos casos rexistrados nos últimos 14 dúas nos 19 concellos da comarca, 80 menos que o pasado venres.

A Taxa aproximada de Incidencia acumulada sitúase nos 600 novos casos por cada 100.000 habitantes, un 10% menor que o día 4.

Falecidos nas residencias

Esta pasada fin de semana faleceron 3 persoas na comarca: o día 5 facíao unha muller de 85 anos na Residencia Domus Vi Vimianzo; e o día 6 falecían un home de 92 e unha muller de 89 na Residencia Domus VI Carballo.
Son un total de 22 persoas as falecidas na residencias carballesa, e 13 na de Vimianzo.

En canto ao número de hospitalizados, hoxe sube a 12 os presentes no Hospital Virxe da Xunqueira, un máis que a semana pasada.