Convocan un "acto veciñal apartidista e reivindicativo" polo Centro de Día de Corcubión

maiores centro de día

09:35 26/09/25

Non cesa o pobo de Corcubión na súa loita por conseguir un centro de día para os maiores da comarca. Así, a Plataforma Xuntos polo Centro de Día de Corcubión convoca para o mércores 1 de outubro un "acto veciñal apartidista e reivindicativo" para volver esixir unha demanda tan loable e necesaria.

A entidade social aproveita a data pola celebración do Día Internacional das Persoas de Idade, proclamado pola Asemblea Xeral das
Nacións Unidas para visibilizar o aumento das persoas maiores e promover a súa calidade de vida e a solidariedade con elas. Unha data para lembrar a obriga das sociedades e dos gobernos a protexer os dereitos das persoas maiores, promover a dignidade e seguridade e asegurar o acceso a recursos.

Ante todo este deixamento, que hoxe en día os nosos veciños e veciñas de Corcubión e da Costa da Morte sofren, sen dereito a un acceso a un Centro de Día e atención socio sanitaria que poida garantir os seus dereitos, dignidade , seguridade e participación e integración na sociedade máis aló do seu pechado núcleo familiar, a entidade faise unhas preguntas:

Por que alí si e aquí non?, por que aquí non e alí si?

Seica son os nosos maiores e os seus coidadores de inferior categoría humana que o resto? sen un dereito a un envellecemento digno, e sen unha atención socio sanitaria xusta e acorde, tal e como goza unha persoa que naceu en Muros, Cabana de Bergantiños, Coruña, Sevilla, Xetafe, Murcia, Madrid, Barcelona ou Teruel por exemplo. Seica non somos todos persoas e os nosos maiores non se gañaron o dereito para vivir e envellecer con coidados e dignidade?

Por que non se poñen as pilas as administracións competentes e deixan de marxinar a toda este grupo poboacional, e sumamos 25
prazas que hoxe en día non existen, sen ningún tipo de interese e disputa política, tan só focalizando o problema e drama social, nos e as habitantes costa morteños que tratan de ser atendidos, e dignificar a súa día a día nun centro de día finalizado; e preparado para abrir segundo apuntan desde o Concello de Corcubión, fai a barbaridade de 11 anos?

Facémonos preguntas e necesitamos respostas, seguimos esperando o paso diante das administracións que seguen coa súa morneza e sen apostar polos nosos maiores, eses que loitaron e traballaron porque hoxe teñamos todos os dereitos, liberdades e facilidades das que gozamos.
Traballaron menos os nosos que outros en calquera nucleo urbano para non ter os mesmos dereitos?

Xestión directa?

Con todo, a entidade, malia considerar que a xestión directa sería a mellor opción, formula a posibilidade de "buscar alternativas para evitar chegar ao mesmo punto, a ese calexón sen saída que xa chegou o anterior equipo de goberno, xustificando os catro anos de lexislatura cunhas simples fotografías de reunión xunto con outros partidos políticos, e concluíndo que a Xunta non nos quere abrir o Centro de Día".

Piden ao actual grupo de goberno "ganas, traballo e vontade para facer moito máis".