Preferente: O XSC saca petróleo do Conco

Preferente: O XSC saca petróleo do Conco

11:00 01/12/14

XSC saca petroleo do Conco-Foto-Mca Cuns

Chegaba o derbi da Preferente - Senra Sport, e as tendencias dos equipos nas últimas xornadas saltaron polos aires. Chegaba o Dumbría moi forte, un Dumbría que a semana pasada metíase de cheo na loita polo ascenso, pero que ve freadas as súas espectativas trala vitoria bicolor, ante un XSC que chegaba regular pero sae moi reforzado do Conco.

Un derbi tremendamente intenso, moi físico, que puido caer de calquera lado, ou de ningún, pero que se decantou nos últimos segundos do lado xalleiro.

Dumbría - Xallas StComba (0-1)

DUMBRÍA: David, Tantán, David Carreira (Jose, min.80), Iago, Pablo Conde, Aarón, Cote, Diego Cespón, Jesús (Darío, min.71), Adrián Makaay e Marcote (Adrián Nieto, min.67).
XSC: Julián, Cristian (Aarón, min.75), Oscarín, Rubén Forján, Rubio, Jota, Baña, Jesús, Pablo Muíño (Joshi, min.82), Kevin (César, min.90) e Marcos.
Gol: 0-1, min.88: Marcos.

Partido físico e duro, igualado en xeral, sen grandes ocasións para ningún dos dous equipos, se ben o cadro dumbriés puido desestabilizar a balanza nun par de chegadas. Comezaba o choque moi bregado, cun Dumbría máis enriba, chegando primeiramente cun tiro de Marcote tras unha acción de Diego Cespón. Respondía Pablo Muíño, un dos moitos que voltaba ao Conco coa camisola bicolor, mandando un balón ao longueiro á media hora. Makaay tivo unha de cabeza e Iago unha boa falta que desbaratou Julián, outro dos ex.

Iago estivo moi activo no Dumbria-XSC-Foto-Mca Cuns

Xa na segunda parte levou o XSC máis peso no partido, con máis posesión e coa iniciativa do xogo; mentres o cadro dumbriés buscaba saídas rápidas, como a que deixaba só a Adrián Makaay, na mellor ocasión do encontro, pero este non puido definir. O partido podíase decantar para calquera dos dous lados, pero cando todo parecía que remataría en táboas, a piques de chegar ao final, un centro de Kevin dende a banda esquerda rematouno Marcos de cabeza anticipándose a David, facendo así o único gol do partido.

Un resultado cruel, valoran os dumbrieses. que aínda tiveron, nos pés de Iago no desconto, unha última ocasión quedandó ante Julián pero entre a brega do defensa e o bote longo non chegou a acertar.