Preferente: Novo intercambio de posicións

Deindo

02 de febreiro de 2015 (10:55 h.)

Unha semana máis, XSC e Dumbría intercambian posicións e seguimos sen poder disfrutar dunha doble alegría nas últimas semanas. Os de Rubén Coméndez voltaban do campo do Val con 3 fantásticos puntos, que o meten na 9ª praza desta Preferente - Senra Sport con 31 puntos. Con 29 queda o equipo de Canosa tras caer en Arteixo nun partido que tiveron de cara e que non puideron matar.

Arteixo - Dumbría (2-1)

DUMBRÍA: Iván, Tantán, Brian (David, min.68), Jose (Cote, min.73), Pablo Conde, Iago, Aarón, Kevin, Jesús (Darío, min.84), Adrián Makaay e Adrián Nieto.
Goles: 0-1, min.15: Tantán marca un golazo; 1-1, min.61; 2-1, min.82.

Escáronselle os puntos a un bo Dumbría, que fixo unha fantástica primeira metade na que puido ter sentenciado o partido. Facía moito frío na mañá dominical na Ponte dos Brozos (-3º), pero o cadro dumbriés non se deixou atenazar e saíu polo partido, tendo na primeira parte o vento a favor. Era un partido importante ademais, pois é o Arteixo o que marca a Promoción, e podía ser un bo momento para auparse á pelexa. Un primeiro tempo completamente dominado polos dumbrieses, cun gran gol de Tantán, e boas ocasións para Adrián Makaay, que mandou ao longueiro, e Adrián Nieto. Por detrás, Iago, coma sempre, imperial de líbero, e Aarón dominando o medio campo. Cambiaron as tornas na segunda, e o Arteixo saíu a por todas co vento a favor, sen deixar saír ao Dumbría da súa área. En 15 minutos houbo 3 ocasións claras e anulouselle un gol a Vituco por claro fóra de xogo. Empataba o cadro local e de seguir o Dumbría vía como o colexiado lle anulaba un gol. O Dumbría defendía o empate con unllas e dentes. Makaay ten unha boa ocasión á contra a 10 do final, e pouco despois Pesco fai o 2-1 nunha preciosa falta directa. Acto seguido caiulle unha a Makaay na área pequena pero non logrou rematar e malia o acoso final dos visitantes, os puntos quedaron en Arteixo, e a zona alta escápaselle aos de Canosa.

Aquí tendes o resumo dos compañeiros de El Noticiero de Arteixo, que recollen tamén unha boa crónica:

O Val - Xallas StComba (2-3)

XSC: Vicente, Rubén Forján, Oscarín, Rubio, Aarón, Jota, Doro, Jesús, Kevin (Pablo Muíño, min.85), Vía Rápida (Choco, min.78) e Pablo Baña (Joshi, min.70).
Goles: 0-1, min.30: Doro; 0-2, min.35: Pablo Baña; 1-2, min.65; 1-3, min.80: Choco; 2-3, min.88.

Gran vitoria do cadro xalleiro tras unha fantástica primeira metade, totalmente dominada, con dous goles de Doro e Baña, que ben pudieron ser algún máis se Kevin, Doro, Vía, Baña ou Jesús tiveran máis puntería na definición. A segunda parte cambiou radicalmente, un pouco debido á relaxación xalleira e outro pouco porque os locais saíron con todo. E fixeron sufrir aos costeiros, ata que Choco, faltando 10 minutos, puña a sentenza. O gol local xa no min.88 non inquedou a vitoria xalleira, tras un gran partido de Kevin e Jesús.