Os que seguen este espazo lembrarán que, fai uns anos, detallábamos aquí a significativa perda de poboación dos nosos concellos (período 2012-2017). En conxunto, o descenso foi de 7.898 habitantes e, xa daquela, sinalábamos a necesidade de cooperar entre os diferentes niveis de goberno para intentar solucionar o problema.

Na actualidade, a información estatística para o período 2018-2022, como se pode comprobar na táboa, corrobora a tendencia negativa global. Esta situación, por tanto, xa non é conxuntural e teremos que actuar de inmediato e de forma decidida para minimizar o impacto negativo do despoboamento, conscientes tamén de que modificar o proceso levará anos.

Nese sentido, algunhas comunidades autónomas (Estremadura, Castela-A Mancha e Galicia) son pioneiras aprobando leis ao respecto. De feito, a nosa Comunidade aprobou a Lei 5/2021, de 2 de febreiro, de impulso demográfico de Galicia que, segundo a exposición de motivos, pretende dar pulo ás actividades económicas no medio rural e costeiro non urbano, máis alá do ámbito agro-forestal e marítimo-pesqueiro, buscando unha modernización e diversificación da súa estrutura económica que garanta a sustentabilidade social, económica e medioambiental (cuestións reguladas no capítulo VI do Título II da Lei).

Pois ben, transcorrido un tempo desde a entrada en vigor desa norma, sería importante coñecer o seu impacto.

Afortunadamente, o Consello de Contas ten previsto realizar, durante este ano, unha auditoría operativa para verificar a eficacia coa que se cumpriron os obxectivos preestablecidos e a eficiencia e economía coa que se aplicaron esas medidas pola Xunta de Galicia. Ademais, como consecuencia dese traballo, tamén se poderán observar os efectos das políticas e estratexias adoptadas, no seu caso, polas entidades locais galegas, para abordar o reto demográfico.

Estamos convencidos de que o resultado dese traballo será de enorme utilidade, non só para identificar e valorar os froitos das políticas públicas implantadas, senón para que os xestores establezan as oportunas medidas correctoras. 

Porque se trata dunha cuestión moi relevante da que debemos concienciarnos todos. Porque, o declive demográfico tende a cronificarse. Porque, todas as institucións públicas deben implicarse máis neste problema, cada unha dentro do seu respectivo ámbito de competencias, como fai o noso órgano estatutario de control externo. E, porque, en definitiva é preciso desenvolver con éxito políticas concretas, para afrontar o progresivo envellecemento da sociedade, evitar a emigración e fomentar a natalidade.

• Domingo Guerra. Economista. Especialista en economía pública e política económica pola USC.

OUTROS ARTIGOS SOBRE ECONOMÍA MUNICIPAL DE DOMINGO GUERRA

• Porque nos afecta e nos importa
• Axenda de obrigas 2023
• O Cometa Haley. A rendición de contas.
• Modificación das regras fiscais. Una cuestión inaprazable
• POS + 2022.
• A Ciberseguridade.
• Estado de rendión de contas.
• Auditoría pública fronte ao fraude e a corrupción.
• Retribucións da alcaldía.
• Un maná que debemos aproveitar.
• Vacacións: non toca escribir sobre economía municipal/a>.
• Fiscalización operativa. Xa é hora.
• A morte do orzamento.
• Despois de xaneiro.
• Momento para o consenso e transparencia.
• Suspensión de regras fiscais.
• A detección de riscos na prevención da corrupción .
• Navegando na «chalana».
• As previsións do FMI
• Fraxilidade económica
• 2020, unha nova década
• Comezar de cero
• Arqueo e inventario.
• A factura electoral.
• Volver a votar.
• Autonomía fiscal.
• Auditores privados nas intervencións municipais.
• Cartos e máis cartos en bancos sen rendibilidade.
• Debemos tributar máis?.
• A Tesourería Municipal.
• Cos deberes feitos.
• Perdemos poboación.
• A conta (413) «Acredores por operacións pendentes de aplicar ao presuposto».