Preferente: Haberá que ollar o retrovisor?

Preferente: Haberá que ollar o retrovisor?

10:55 16/03/15

Adrián Makaay pelexando cun defensa no Dumbría-Estudiantil-Foto-Oscar

Non foi, de novo, moi positiva a xornada 28 para o nosos Preferente - Senra Sport. Un empate e unha derrota que deixan aos nosos en posición regular, pero aínda sen necesidade de mirar cara atrás pois Dumbría e XSC aínda teñen 10 e 8 puntos, respectivamente, sobre os postos de descenso.

Un puntiño sumou o Dumbría na visita dun mellor do esperado Estudiantil, que puido sacar algo máis do Conco.
Por Sada, fíxoselle demasiado pequena a portería aos Doro, Vía Rápida e Choco, o que unido ao bo papel do meta local e aos despistes atrás, propiciou unha nova derrota do XSC.

Sp. Sada - Xallas StComba (3-2)

XSC: Vicente, Alberto (Cristian, min.85), Oscarín, Rubio, Aarón, Jota, Rubén Forján (Marcos, min.60), Jesús, Vía Rápida, Choco (Kevin, min.82) e Doro.
Goles: 0-1, min.25: Doro; 1-1, min.44; 1-2, min.53: Jesús de penalti; 2-2, min.83; 2-3, min.93.

Tivo os puntos na man do equipo xalleiro pero volta de Sada de baldeiro. O equipo de Coméndez pagou a falta de acerto para matar o choque, e os seus propios erros atrás, e permitiu que o cadro local lle dese a volta ao marcador nos últimos minutos.

As mellores ocasións xalleiros, despois da boa primeira metade dos verde-laranxas, só empañada polo gol do empate que chegaba ao fío do descanso, chegaron co 1-2. Despois de que Jesús metese por segunda vez por diante aos xalleiros ao comezo da segunda, tivo Doro un man a man que tirou contra o porteiro; tivo tamén Choco un remate dentro da área pequena no segundo pau pero o seu remate se marchaba alto; tamén houbo unha xogada pola liña de fondo de Choco que saca o centro atrás pero Vía, con todo a favor manda fóra. Un Vía que tamén tivo outra na que probaba ao porteiro, que albiscaba adiantado, desde uns 25 metros e o balón saía rozando o longueiro. Por se son poucas, tamén Doro puido ampliar a renda nun remate de cabeza no segundo pau que ía ás mans do porteiro.

Así, perdoou o cadro xalleiro arriba, e regalou atrás, e nunha indecisión permitiu que o cadro sadense dera a volta ao marcador nos últimos minutos, chegando o gol da vitoria local, xa no desconto.

Dumbría - Estudiantil (0-0)

DUMBRÍA: Iván, David (Jose, min.73), Brian, Iago, Pablo, Aarón, Diego Cespón (Jesús, min.50), Rivi, Darío (Javi, min.64), Adrián Makaay (Adrián Alcaina, min.83) e Adrián Nieto.

Empate soso no Conco, que sabe regular nas filas dumbriesas. I é que o cadro local sufríu a superioridade total do Estudiantil na primeira parte. Pero conseguía aguantar ben o empuxe ata o descanso.

Cambiaron as tornas na segunda metade. Mellorou o equipo de Canosa, e mesmo tiveron a posesión do balón e algunha ocasión para poñerse por diante, sobre todo por medio de Javi e Makaay. Tamén tiña o Estudiantil a algunha contra que creou perigo pero o marcador non se movería.