1ª Autonómica: Á Esteirana non lle chega con gañar

08:30 20/04/15

Mala esta 31 xornada da 1ª Autonómica - Clínica Vértebra. A pesar da vitoria ante o Corme, a Esteirana está a un paso de confirmar o seu descenso. As vitorias de Lesende e Amio deixan ao cadro blaugrana a 6 puntos da salvación con 9 en xogo, polo que a permanencia parece moi complicada.

Polo demais, o Baio mantense arriba tras gañar ao Cordeiro, e supera a unha SD que non puido co líder e que xa pensa máis na Copa. O Soneira asinou un soso empate ante o Flavia e o Malpica fíxolle fraco favor á Esteirana caendo ante o Lesende, nun choque no que os malpicáns puideron compriobar como as gastan as arbitraxes santiaguesas. Para que logo chegue o Villestro a pedir superivisión ao Carral…

A Clínica Vértebra, coa fisioterapeuta Berta Reimúndez e a podóloga Alicia Novás, patrocina a 1ª Autonómica e espérate en Baio. Coñéceas en Facebook

Sofán - Villestro (0-5)

SOFÁN: Lerma, Ceide, Marcos Pensado (Iván Rojo, mnin.61), Sito, Seo, Rubén (Pablo Martínez, min.15), Míchel, Luis, Bertón, Brais e Raúl (Méndez, min.68).
Goles: 0-1, min.13; 0-2, min.14; 0-3, min.23; 0-4, min.63; 0-5, min.83.

Nada puido facer a SD ante a visita do líder. Como un ciclón pasou o Villestro polo Carral. Tiña moitas baixas Josiño, que xa pensa máis na Copa da Costa que na Liga, e a intensidade dos visitantes foi suficiente para levar o partido.

Dúas xogadas a balón parado ao cuarto de hora practicamente sentenciaban o choque ante unha SD que intentou reaccionar pero que non puido.

Unha SD que lamenta que o Villestro solicitase un delegado federativo para supervisar a arbitraxe no Carral, por mor das “supostas dúbidas nas arbitraxes costeiras”. Algo que a SD entende como de “dubidosa elegancia”.

Soneira - Flavia (0-0)

SONEIRA: Anxo, Efe, Chans, Brais Mouzo, Alberto, Mayor, Sandelo, Cristian Figueroa, , Brais Triñanes, Richie Nazo. Tamén: Maykel, Jose, Basti e Fran de Urroa.

Partido soso, cunha parte para cada equipo pero nada de goles. Comezou o Flavia máis metido no partido, ante un Soneira desaparecido que contou só cunha ocasión de Chans, e ao que lle tocaba aguantar as embestidas dos padroneses.

Saía mellor o Soneira tralo descanso, e tivo varias ocasións, pero, como nos ten acostumados ultimamemente, sen demasiado acerto. Pronto Figueroa, desta volta no extremo, cazaba un rexeite a tiro de Nazo pero o seu testarazo marchaba ao longueiro. Sandelo rozaba o pau nun tiro e na seguinte Figueroa marraba na liña de gol nun remate que era complicado marcalo que fallalo. Tivo tamén a súa o Flavia faltando 20 minutos, nos que o Soneira, con baixas, só tivo unha máis no desconto, por medio, de novo, de Figueroa, que estivo tan activo como desacertado cara gol.

Esteirana - Corme (2-1)

ESTEIRANA: Ramón, Code, Simón, Sui (Adri de Louro, min.70), Rafa, Martín, Adrian, Juan de Celia, Jose, Andel (Kike, min.46)e Pablo.
CORME: Suso, Adolfo (Brais Torrado, min.68), Alejandro, Joshua, Pandi, Sergio Sueiro, Juan Chans, Diego, Toniño (Dani Cousillas, min.43), Lucas e Alejo.
Goles: 0-1, min.40: Alejo de penalti; 1-1, min.75: Pandi en propia meta tras unha gran xogada de Juan pola liña de fondo; 2-1, min.88: Kike de cabeza.

Chegaba a Esteirana con ata 5 xuvenís na convocatoria para esta final (Rafa, Pablo, Jose, Juan de Celia e Adrian de Louro) e aínda así deron a de cal os blaugranas colleitando unha vitoria ante un fantástico Corme que chegaban tras 10 partidos sen perder, pero que sucumbiron ante a necesidade dos locais. Unha necesidade que se antoxa case que insalvable, pois os resultados non acompañaron e as vitorias de Amio e Lesende deixan a salvacación a 6 puntos, con só 9 en xogo.

Chegaba tamén tocado o Corme pero prantexou un bo partido, xogando mellor a primeira metade na que se adiantaron co gol de Alejo dende os 11 metros. Xa leva 21 o pichichi da categoría. Antes, Jose tivo un cabezazo claro que parou Suso, que tamén atallou o rexeite a tiro de Andel.

A Esteira estirouse na segunda, pero á contra o Corme puido sentenciar. Pablo, Kike e Jose tiveron unha triple ocasión que sacou Suso en plan Fabricio. Unha gran xogada de Juan por banda acababa cun pase atrás e Pandi, no seu intento de despexar, marcaba en propia. Foise con todo o cadro local pola vitoria e Kike, case que co tempo cumplido, anotaba o gol dunha vitoria que seguramente non servirá para nada.

Lesende - Malpica (1-0)

MALPICA: Abraham; Adrián, Diego, Pablo Díaz, Alemán, Baba (Petís, min.23), Rancaño (Rodrigo, min.62), Fernando Varela, Cololo, Joel Pereiro e Diego Alonso.
Gol: 1-0, min.69.
Lesión: Baba por molestias nun nocello.
Expulsión: Diego Alonso por protestar xa co partido rematado.

Non puido sacar nada o Malpica de Sesende, facéndolle un fraco favor á Esteirana, e sumou a primeira derrota dende que Tito Pedreira asumise o mando do banquiño. O equipo acusou as baixas de Cheo, Baba, Martín Mara e Esteban, e ademais protestaron encarecidamente a actuación arbitral.
A directiva malpicá lamenta a arbitraxe da zona compostelá, protestando un penalti por mans e área local non pitado, unha agresión a Adri que o colexiado pudio ver pero non sinalou nada.

En todo caso, o equipo de Sil buscou con máis ahínco a meta visitante, estivo máis intenso e buscou os balóns directos, ante un Malpica, que non arriscaba pero que parecía algo relaxado.

Cordeiro - Baio (0-2)

O Baio saltando ao campo do Cordeiro-Foto-Santi Soneira

BAIO: Pollo, Yago, Ramón (José A., min.56), Mario, Fachal, Martín (Fredi, min.82), Bieito, Brais, Saleta (Fran, min.87), Christian (Rubio, min.46) e MC.
Goles: 0-1, min.20: Christian; 0-2, min.57: Rubio.

O capi baies Martin cos arbitros e o capi do Cordeiro-Foto-Santi Soneira

Partido moi serio do Baio que non permitiu licencias en ataque ao equipo local e que, pola contra, si que tivo varias chegadas á área rival. Os de Félix saíron moi enchufados e aos 20 minutos Christian abría o marcador. Seguían chegando ocasións ata que Rubio marcaba o segundo e practicamente mataba o partido.
Cómpre destacar o re-debut de Fredi e do xuvenil de primeiro ano Fran.

Aquí, os goles da man de Santi Soneira: