Completo repaso á actividade mineira dunha loita que se extende a Zas e Santa Comba

09:45 30/05/13

Moita información esta fin de semana arredor da mina de ouro de Corcoesto. Por unha banda, os membros da Plataforma Corcoesto Si, Mina Si, realizaban o pasado luns unha marcha nocturna ata Santiago para facerlle entrega de 7.000 sinaturas a favor do proxecto.
Ademais, tamén en clave de aprobación, o deputado do PP, Aurelio Núñez, confiou de novo no polémico informe ambiental, e ademais asegurou que a iniciativa “é beneficosa e ten o apoio dunha maioría da poboación", algo que as cifras de sinaturas (case 200.000 en contra polas 7.000 a favor) non demostra.

Houbo onte tamén movemento no pleno de Coristanco, onde a corporación municipal aprobou unha moción para solicitar á Xunta que paralice parte do proxecto mineiro, o que afecta aos permisos de exploración nas parroquias coristanquesas. Unha petición que, sen embargo, non inclúe a paralización total do plan de traballo da mina.

Completa fin de semana

Carballo acollerá un concerto contra a Mina

Mentres, os colectivos en contra da mina seguen realizando actividades. Salvemos Galicia, que conta xa co apoio de novas institucións como o Partido Animalista PACMA, están en marcha con novas actividades, como o Concerto "antiminería" deste venres que terá lugar en Carballo.

A fin de semana será completa. O sábado 1 de xuño a partir das 11 da mañá e durante todo o día terá lugar unha xornada lúdica na Carballeira de Santa Mariña de Corcoesto. Baixo o lema "Contra os proxectos de minería agresiva", esta é unha convocatoria artístico reivindicativa promovida polos artistas Delio Sánchez de Factoría Delideas e os compoñentes do Colectivo arTeu, Inma Doval e Xacobe Meléndrez, en colaboración coa Plataforma Pola Defensa de Corcoesto e Bergantiños e co apoio da Federación Ecoloxista Galega (F.E.G.). Poderemos ver traballando a pintores-as, videoartistas, escultores-as, fotografas… intervirán tamén artistas do mundo do espectáculo e irán sucedéndose as actuacións de músicos do país coas súas versións máis acústicas; nunha xornada de convivencia, creatividade e compromiso. O publico asistente poderá tamén participar nun taller de estampación e no pintado dunha lona colectiva coordenado polo Grupo Contraminate de Laxe. Todas as persoas que queiran poden levar os seus pinceis, papeis e calquera outro aparello para realizar as súas creacións.
Rematarase a xornada coa lectura do Manifesto de Enarborar o Bosque en Corcoesto.

E a gran cita da fin de semana será a Gran Manifestación que este domingo percorrerá compostela en contra da minería contaminante.

A loita exténdese a Santa Comba e Zas

Pero as intencións da Xunta de espallar a febre mineira e explotar toda a beta que percorer o país de norte a sur continúa. Como nos explicaron no vídeo de Salvemos Galicia, as vindeiras paradas extrativas poderían ser en Zas e Santa Comba, polo que a Plataforma ContraMINAcción-Xallas quere comezar a traballar aportando información.
Así, este novo colectivo anima primeiramente á veciñanza xalleira a participar na manifestación do 2 de xuño en Compostela.

Ademais, queren alertar da ameaza que paira sobre a comarca cos proxectos de extracción de ouro para os que solicitaron permiso Río Narcea Gold Mines SL, Mineira de Corcoesto SL e Río Narcea Nickel SA, todas filiais da empresa canadense Edgewater Exploration. Estes proxectos abarcan un total de 1.680 hectáreas e afectan aos Concellos de Santa Comba e Zas. Agora mesmo, hai solicitados tres permisos de investigación denominados Grixoa, Vilar e Monte Castelo.

Trátase de minaría a ceo aberto totalmente incompatible coas actividades do sector agropecuario, que é a principal actividade económica do concello de Santa Comba, e incompatible tamén coa vida dos e das habitantes do medio rural xalleiro. Entre Santa Comba e Zas hai 1.528 explotacións agrogandeiras (INE, Censo Agrario do 2009) que sosteñen miles de postos de traballo directos e indirectos de carácter permanente.

A bisbarra de Santa Comba é rica en arsenopirita, un mineral que ten un 46% de arsénico. Este elemento químico, o arsénico, é un veleno para nós e os nosos animais. Podemos intoxicarnos inxerindo bebidas ou alimentos que o levan. O arsénico que inxiramos hoxe, acumúlase co de onte e unirase ao de mañá. É canceríxeno, tamén pasa aos fetos a través da placenta e provoca neles alteracións e malformacións graves, e tamén pasa ao leite. Non sabe nin ole, é un asasino silencioso. O arsénico está atrapado nas rochas e non pode ser disolto pola auga pero, se voamos as rochas ata partículas moi pequenas, o arsénico xa pode disolverse na auga, ademais de viaxar polo ar. Algúns dos permisos de investigación solicitados o son para obter arsénico.