Corcoesto une a acción contra a minaría de Galicia

10:03 20/05/13

Doble cita da loita antimineira tiveron lugar estes días en Galicia. Os membros da Plataforma Contramínate realizaron unha xuntanza o pasado sábado en Laxe para decidir as vindeiras mobilizacións a nivel comarcal. Mentres, a nivel galego, ContraMINAcción convoca unha grande manifestación o 2 de xuño para frear a minaría salvaxe promovida pola Xunta.

Accións na comarca

Asemblea de Contraminate no Salon de Plenos de Laxe-Foto- Jose Manuel Ojen

Cedeu o Concello de Laxe o seu Salón de Plenos para a realización da Asemblea da Plataforma Contramínate. Unha ducia de representantes estableceron as liñas para as vindeiras datas, propoñendo ademais manter tres reunión mensuais coa orde do día habitual e unha para informar e recibir á xente nova interesada polo tema.

Se ben a constitución dunha asociación e a creación da páxina web queda posposta, no que si avanzaron foi na mellora e optimización da estrutura das comisións de traballo, quedando así: comisión de deseño, comisión de prensa e comunicación, comisión científica, comisión Internet e correos internos e una nova comisión, a de acción inmediata.

Tamén estableceron as vindeiras propostas informativas e reivindicativas. Así, en canto as charlas, concretaron a do día 20 coa federación de empresarios en Baio, a do 22 de maio para os veciños do Rosales en Coruña, que imos publicitar desde o facebook. A outra charla é o 27 de maio en Baio as 20h30 no Auditorio. Queda pendente de confirmación a do luns 10 de xuño no local Alexandre Bóveda de Coruña, a petición do BNG. Na charla prevista para a cofradía de pescadores de Laxe, hai pendente de fixar o día e a hora.

Ademais haberá tamén unha ruta de sendeirismo para o vindeiro día 26, o mesmo día que a marcha nocturna do Colectivo Corcoesto Si, Mina Si, un concerto solidario para o 31 de maio, un festival multicultural, e a convocatoria para a masiva manifestación do 2 de xuño.

Manifestación de ContraMINAcción

ContraMINAcción presentando a manifestación do 2 de xuño

E abrindo o ámbito a toda Galicia, a plataforma ContraMINAcción convoca unha grande manifestación o 2 de xuño para frear a "minaría salvaxe promovida pola Xunta". Representantes de varias das organizacións que integran o colectivo ContraMINAcción1 ofreceron unha rolda de prensa a pasada semana para anunciar unha grande manifestación en Compostela para o vindeiro 2 de xuño, que partirá ás 12:00 horas da Alameda.

O primeiro en falar foi Xoán Doldán, profesor da USC e presidente da Asociación de Economía Ecolóxica de España, que participou como representante de Véspera de Nada. Doldán advertiu que os proxectos que ContraMINAcción denuncia non afectan só a algunhas parroquias e comarcas, senón que supoñen “un desembarco masivo de empresas transnacionais mineiras, co apoio activo do Goberno Galego, para transformar radicalmente o noso territorio e convertelo nunha mina a ceo aberto”. Tamén advertiu o profesor da USC que se está a promover unha “economía da miseria”.

Iñaki Varela, da organización ecoloxista Verdegaia, denunciou que, tanto a Xunta como o Goberno do Estado, introduciron cambios lexislativos nos últimos tempos dirixidos a quitar todo tipo de traba á explotación da terra como fornecedora de recursos para empresas privadas.

Na mesma liña abondou a secretaria xeral do Sindicato Labrego Galego, Isabel Vilalba Seivane, que comparou este modelo “depredador do noso medio rural e do noso futuro” coa explotación colonial que sufriron no pasado América Latina e África.

Finalmente, falaron representantes de colectivos que se opoñen aos proxectos mineiros de extracción de feldespato na Limia e de ouro en Corcoesto. Pola Plataforma en Defensa de Corcoesto e Bergantiños falou Roi Veres, que chamou a atención sobre a división e enfrontamento veciñal que está a provocar este proxecto. Veres denunciou as ameazas e mentiras que están a padecer os propietarios das terras afectadas por parte da empresa, que pretende mercar os terreos a prezo de saldo.
Lola Sanspapiers, de Contramínate Laxe, afondou sobre o impacto medioambiental que tería este proxecto, que supón unha seria ameaza para os recursos pesqueiros, percebeiros e marisqueiros, do mesmo xeito que para os acuíferos, o medio ambiente e a saúde das persoas que viven no entorno.