Ligas Galegas: O XSC necesita a vitoria na última xornada para salvarse

08:15 05/05/15

O XSC necesita os 3 puntos ante o Calasanz

Queda unha xornada para o remate da Liga Galega Cadete - Aluminios Dumbría. Tocáballe descansar aos equipos dumbrieses en ligas autonómicas, pero o XSC tiña un compromiso vital. Só valía a vitoria e malia que tocou sufrir, os de Corredoira sacaron adiante os tres puntos cun triplete de Carlos Rieiro.

Agora só vale a vitoria ante o Calasanz na última xornada, pois unha derrota e as vitorias de Orillamar e Vilalbés darían co cadro xalleiro na liga comarcal.

Xallas StComba - Atl. Arteixo (3-1)

XSC: Rubén, Óscar (Thiago), Alberto, Pablo, R; Raúl, Juanjo, Juan Lois; Carlos Rieiro (Mosteiro), Carlos Baio (Héitor) e Grille (Manuel).
Goles: 1-0, min.28: Carlos Rieiro; 1-1, min.67; 2-1, min.72: Carlos Rieiro; 3-1, min.78: Carlos Rieiro.

Xusto triunfo do XSC fronte a un Arteixo moi combativo e que, na segunda metade, chegou a empatar a contenda, para resolvela, nos últimos minutos, o Xallas de Santa Comba mercé a un Carlos Rieiro atinado ate a meta contraria.
Desde o principio o XSC saíu a por o triunfo, pero atopouse cun equipo moi ben organizado e que freaba as acometidas verdenaranjas. No entanto, antes do descanso conseguirían os xalleiros adiantarse no marcador.

A segunda metade mantivo a mesma tónica, cun Xallas ben plantado sobre o terreo de xogo e un Arteixo que buscaba, á contra, o empate. E nunha acción illada, deste xeito, conseguían os visitantes un sorprendente tanto, en erro da zaga local.
Lonxe de amilanarse, o XSC sacou forzas de onde non as había e conseguiu volver adiantarse no marcador ata alcanzar un triunfo xusto e merecido e moi importante para conseguir o obxectivo da permanencia, que pasa por sacar os tres puntos na Coruña, ante o Calasanz.