1ª Autonómica: Sosa despedida de curso

08:49 11/05/15

Última xornada da 1ª Autonómica - Clínica Vértebra, cunha triste despedida, sobre todo para a Esteirana. O cadro blaugrana deixa a categoría e volve á Liga da Costa despois dunha temporada irregular, que comezaba fatal e que tardou en enderezarse. O seu posto será tomado polo Outes e veremos se o Zas pode completar unha 1ª con 7 equipos costeiros (esperemos que non sexan 8 e que non descenda o XSC…).

Polo demais, a tempada se pechaba cun fermoso derbi en Pedra Queimada. Malpica e Soneira disputaban un encontro igualado e intenso, limpo e con alternancias, que puido acabar de calquera lado. O empate deixa ao Malpica na 7ª praza e ao Soneira na 13ª, a pesar de haber só 2 puntos de diferencia entre ambos. Nese nutrido grupo da zona media da táboa atópase tamén o Corme, na 8ª praza, que caía co Unión pero que culminou un final de tempada espectacular.

De espectacular tamén se pode calificar a tempada do Baio de Félix. 4º cun equipo da casa demostra que facelas cousas ben apostando polo propio é posible.

E tamén hai que loubar a traxectoria do Sofán, na primeira temporada da súa historia na categoría, que despois de estar media temporada no liderato, desinchouse algo no treito final e remata 6º, pechando o grupo de arriba.

3 equipos, Esteirana, Malpica e Soneira, xa despiden a temporada pois xa quedaron eliminados da Copa. Baio, Sofán e Corme van con moita forza.

A Clínica Vértebra, coa fisioterapeuta Berta Reimúndez e a podóloga Alicia Novás, patrocina a 1ª Autonómica e espérate en Baio. Coñéceas en Facebook

Malpica - Soneira (1-1)

11 do Malpica ante o Soneira-Foto-Luis Porto

MALPICA: Abraham; Adrián, Marcos Amado, Pablo Díaz, Rancaño (Ángel, min.63), Fernando Varela, Petís, Cheo, Rodrigo (Baba, min.52), Diego Alonso e Xulián.

11 do Soneira en Pedra Quimada-Foto-Luis Porto

SONEIRA: Anxo; Figueroa, Chans, Fabián, Maior, Fran de Urroa, De la Sierra, (Nazo, 57), Sandelo, Basti, Javi e Brais Triñanes.
Goles: 1-0, min.58: Baba a pase de Cheo; 1-1, min.68: Nazo a centro de Javi.

Cheo e Fran de Urroa cos arbitros-Foto-Luis Porto

Puido gañar calquera o sábado en Pedra Queimada. Malpica e Soneira despedían unha irregular temporada pero que se pecha de xeito relativamente positivo, con dous boas posicións (7º e 13º a pesar de ter só dous puntos de diferencia entre ambos). E o fixeron cun fermoso partido, de ida e volta, que rematou cun empate. A maior cantidade de ocasións claras corresponderon ao Malpica, con un Cheo que, aínda que non puido estar na mellor das formas, segue marcando as diferencias nesta liga e dou catro ou cinco asistencias tremendas desde o extremo dereito. Así e todo, Javi desperdiciou unha oportunidade clarísima, das que non se soe fallar, para marcar o primeiro gol para o Soneira e no último suspiro tamén os soneiráns puideron decidir o partido pero o cabezazo á saída de un córner saíu fóra por moi pouco.

En todo caso, por Malpica consideran unha temporada nula, unha temporada que partía con moitos obxectivos, que comezou mal, que mirou en fite a traxedia co pasamento de Pombo, e que deixa un futuro incerto.

Baio - Piloño (2-2)

BAIO: Manuel, Yago (Fran, min.65), Porto, Mario, Jose (Ramón, min.46), Norber, Fachal (Silvariño, min.73), Brais, Saleta, Christian (Fredi, min.84)e MC.
Goles: 1-0, min.42: MC de penalti; 2-0, min.66: Saleta; 2-1, min.88; 2-2, min.94.

Empatou o Piloño nos 5 últimos minutos un partido que o Baio tiña practicamente controlado. Pero os de Félix, xa sen nada en xogo máis que brindar unha nova vitoria a súa gran afección, viu como o arreón final do cadro visitante tivo premio, e levou un punto do Platas Reinoso. Antes, MC volveu marcar e Saleta facía o segundo.

O equipo de Félix pecha unha temporada espetacular, quedan nada menos que 4º na táboa cun equipo de xente da casa, que combina a perfección a veteranía dos Martín e compañía coa xuventude do outro Martín, MC, e o resto de rapaces que prometen un futuro fantástico a este comprometido club.

Aquí os goles da man de Santi Soneira:

Corme - Unión (1-2)

CORME: Javi, Dani, Pandi, Miguel Torrado, Alejandro (Samu, min.75), Diego, Sergio, Brais, Juan Chans, Lucas e Toniño.
Goles: 1-0, min.22: Juan Chans; 1-1, min.25; 1-2, min.60.

Fermoso partido no Cairo entre dous grandes equipos. O Unión demostrou por que é o 3º da categoría e, entregouse a fondo. O Corme, máis relaxado, cos deberes feitos tras unha espectacular segunda volta, tivo máis o balón e combinou con tranquilidade, a pesar das baixas. Adiantouse Juan Chans pero o Unión respondeu rápido e empatou o choque.

O guión non variou na segunda, cun Corme máis dominador e un Unión que fixo o segundo á contra para levar os 3 puntos.

Sigüeiro - Esteirana (5-0)

ESTEIRANA: Ramón, Rafa, Sui (pachín, min.65), Dani, Eloi, Martín, Adri, Jose, Álex, Pablo (Code, min.65) e Róber Pladur.

Partido sen historia como demostra o marcador, cunha Esteirana que xa tiña a toalla tirada dende fai varias xornadas. Antes o primeiro gol aínda tiveron Róber e Jose un par de ocasións, pero fallaron, acertou pronto o Sigüeiro e a segunda metade se lle fixo eterna aos de Pedrosa.

Temporada estrana esta para a familia de Esteiro, que comezaba fatal, que vía visos de enderezarse ca chegada de Pedrosa, pero o equipo comezou demasiado tarde a reacción, e non chegou a tempo para a salvación. Volverá o ano que vén á súa Liga da Costa.

Sofán - Lesende (0-2)

SOFÁN: Brais Vázquez, Ceide (Marcos Pensado, min.70), Sito, Rubén, Félix, Leilán, Seo (Maneiro, min.46), Raúl, Luís, Brais (Rojo, min.46) e Bertín (Martin, min.46).
Goles: 0-1, min.37; 0-2, min.73.

A SD Sofan despediu a temporada nas Eiroas-Foto-SD

Chegou necesitado o Lesende ás Eiroas e levou a vitoria, nun choque no exilio que provocou que houbse pouco público. A SD dominou e tivo boas ocasións, como un man a man e un remate de Rojo. Pero o Lesende foi máis eficaz e en dúas contras matou o partido.