Novas denuncias medioambientais e coercitivas contra a mina de ouro de Corcoesto

Cabana Costa da Morte

09:40 10/06/13

Imaxe contra a mina ouro en Corcoesto-Foto- Maria Aurora Rodriguez

Nova fin de semana cargada de novas relativas arredor da mina de ouro de Corcoesto. Con varias polémicas en torno a espazos públicos non cedidos para charlas informativas que logo tratamos, tamén coñeciamos que a Xunta concedía unha subvención de 300.000€ á empresa mineira, ao tempo que alertaba do risco de contaminación por arsénico de 6 regos da zona.
O alcalde facía público un bando no que recomendaba non consumir as augas das fontes de Augalavada, Santa Mariña, As Labradas, Picotos Sur, Picotos Norte e Xabarido, que se soen utilizar para regadío.

Eliminación do Río Lourido

E precisamente nesa liña chega a carta que a Asociación Provincial Petón do Lobo lle envía á Augas de Galicia e á Consellería de Medio Ambiente, Territorio e Infraestructuras da Xunta de Galicia. O presidente Ismael López denuncia os "defectos de tramitación en relación á eliminación do río Lourido no proxecto mineiro", polo que solicita a declaración de nulidade da Declaración de Impacto Ambiental favorable, baseada na eliminación do río Lourido e non o seu desvío como pretende facer a empresa promotora".
I é que sinala que o propio informe técnico inclúe un apartado cuxo título é "Eliminación do río Lourido", e non a desviación como está facendo entender a Xunta.

Dende O Petón do Lobo advirten ademais "do risco de mobilización de lodos mineros e dinámica presumible dos mesmos ao ser arrastrados fóra da balsa pola inundación da mesma, xa que o nacemento do río Lourido queda debaixo da mesma. Ditas partículas tóxicas irán parar á canle de desagüe no punto de perigo".
Uns verquidos que denuncian irán a parar ao río Anllóns (Zona LIC) e a ríaa de Corme-Laxe, coa consiguiente afectación das augas, marisqueo, e zona ZEPA das marismas do río Anllóns (Ponteceso), e ao Rego Batán coa consiguiente contaminación dos mesmos.

Charlas? Aquí non

Denunciaba este pasado venres a Plataforma en Defensa de Corcoesto que o Alcalde de Cabana denegou a solicitude para utilizar o auditorio municipal o día 14 de xuño ás 20.00 h., para dar unha conferencia sobre as consecuencias do Proxecto da mina a ceo aberto de Corcoesto. A conferencia ía ser impartida por Serafín González Prieto, Doutor en Bioloxía, membro do CSIC e presidente da Sociedade Galega de Historia Natural, e Xoán R. Doldán García, Doutor en Ciencias Económicas, profesor de Economía Aplicada da Universidade de Santiago de Compostela, e apuntábase a responsabilidade social de informar á veciñanza sobre os efectos da mina de Corcoesto.

O Concello aseguraba que a esa hora estaba ocupado o auditorio.

Pero onde si terá lugar unha charla sobre a Megaminería será na casa de escola de Muíño, Zas. Hoxe, luns, ás 22:00h, a plataforma ContraMinAcción explicará a situación global da minería en Galicia, facendo ficanpé nas posibles implicacións para as terras de Zas e Santa Comba, incluídas no chamado cinto do ouro galego.