O Presidente da Cámara Oficial Mineira é nomeado director da Mineira de Corcoesto

Deindo
11 de setembro de 2013 (08:45 h.)

Francisco Aréchaga, actual presidente da Cámara Oficial Mineira, acaba de ser nomeado presidente da Mineira de Corcoesto. Unha decisión que sitúa aos intereses mineiros galegos ao carón da multinacional canadiana e que, segundo a plataforma Salvemos Cabana obedece á intención da compañía de presionar á Administración da Xunta para a aprobación definitiva do proxecto mineiro entre os concellos de Cabana, Coristanco e Ponteceso.

Pola súa banda a compañía destaca nun comunicado que a fichaxe do Presidente da Cámara responde ao seu "compromiso coa "moderna minería sostenible e coa responsabilidade social corporativa". A empresa indica ademais que a contratación se dá despois de que a Xunta obrigase a "aportar máis garantías técnicas e financeiras", pero sinala que "A Xunta ve viable o proxecto".

Mentres, para a Plataforma conservacionista, "Mineira de Corcoesto intenta asegurar o proxecto aurífero grazas a este enxeñeiro de minas asturiano coñecido pola súa frecuente defensa pública dun concepto irreal como o da minaría sostible, algo en ningún caso realizable dado que calquera actividade mineira ten data de caducidade e a explotación do recurso supón o seu esgotamento, xerando un gran número de impactos ambientais, e sendo a actividade industrial que máis residuos xera a nivel mundial", apunta esta plataforma.

"Arma contra a crise"

O novo director xeral corporativo de Edgewater en Galicia vende o proxecto de Corcoesto como a arma definitiva para "superar a crise económica" a través dos 271 postos de traballo que a empresa ofrece. Con todo, "non fala das posibles consecuencias que esta actividade mineira de carácter intensivo terá sobre os restantes sectores produtivos, especialmente o agropecuario que emprega segundo as estadísticas oficiais na Bisbarra de Bergantiños a 2.714 persoas", segundo denuncia a Plataforma.

O proxecto de As Pontes

Francisco Aréchaga, director do complexo Mineiro de As Pontes dende os anos 90, pasou a ser director territorial para o noroeste da compañía eléctrica Endesa, asumindo a responsabilidade executiva das centrais térmicas de As Pontes, en A Coruña e de Compostilla, en León, industrias que en ambos casos non se caracterizaron por ser os mellores exemplos de respecto ao medio ambiente.

Así, o lago artificial de As pontes, tan a miúdo defendido por Aréchaga, dista moito, segundo Salvemos Cabana, "da visión idílica que se veu presentando dende a Cámara Oficial Mineira", pois nalgunhas das escorrentías do perímetro chegaron a rexistrarse altos niveis de acidez ata mil veces superiores aos normais, que foron compensados de xeito artificial coa descarga de camións de cal "no que supón unha verdadeira chapuza ambiental autorizada pola Xunta".

Novas relacionadas

Artigos relacionados

Máis información

Fonte

  • Nova do xornal colaborador GC.
  • Redacción de QPC (info@quepasanacosta.gal).
Etiquetas
Cabana Ponteceso Costa da Morte