Cen anos de saudade: Corcubión 1923- 2022

historia libro memoria

Angel Martinez Moar e Abraham Trillo — Abraham Trillo con Ángel Martínez na firma do libro “Cen anos de saudade: Corcubión 1923 - 2022” celebrada no Casino de Corcubión.

Cen anos de saudade: Corcubión 1923- 2022

07:48 21/07/25

Escribir a Historia no dobre sentido da expresión. Ángel Martínez Moar leva escribindo de forma práctica e activa a historia do seu pobo dende neno e, agora, escribiuna tamén con letras dando lugar ao libro que o pasado día once presentou na Casa da Cultura de Corcubión nun evento sen precedentes no que a totalidade das butacas vermellas e gastadas do salón de actos estiveron ocupadas. “Cen anos de saudade: Corcubión 1923- 2022”. Só recordo un cheo similar a este, e é o que se dou nun dos festivais de fin de trimestre que os alumnos de primaria preparábamos por Navidade no mesmo lugar; a diferenza é que nós íamos obrigados para que logo nos deran as notas, mentres que a asistencia ao acto do venres foi, claramente, voluntaria por parte da veciñanza. O pobo quixo acompañar ao seu cronista.

Este libro quíxeno escribir eu aos oito anos motivado polas gañas de que tódalas historias, mitos e lendas que Pili me contaba sobre esta vila nobre e os seus habitantes non caeran no olvido. O ser humano precisa, tal vez respondendo a un mandato biolóxico, deixar un legado para o futuro. Atópome moi contento de ver este libro rematado, mellor traballado e con máis fundamentación argumental, sen dúbida, do que eu daría escrito naquel entón; e moi contento tamén de observar a presenza nel de Pili - segunda avoa - entre as dos outros colaboradores. O pouso memorialístico de Pili dá para un libro aparte. O feito de que o libro que Ángel nos regalou o confeccionara tendo en conta tanto os recordos propios coma os dos demais veciños, é moi reseñable. Máis aínda nestos tempos nos que a Historia e a Memoria oficiais son froito das medidas que decidiu implementar o Goberno daquel nefasto Presidente que tivo España - e cuxo apelido envileciu o antigo oficio de facer zapatos - dende os seus despachos.

Centrándome na presentación estética e material da fermosa obra da que hoxe estamos a tratar, resúltame entrañable e curioso a súa similitude, a simple vista, cos libros de escola que non fai tanto tempo deixei de utilizar. E, pensándoo ben, libro de escola debe de ser a partires do momento da súa publicación para os actuais e próximos corcubioneses. Un pobo sen memoria non é un pobo. Compre coidala. Ángel, se non lla devolveu, refrescoulla. Corcubión ten unha débeda con este home. Eu, nestas liñas, xa lle estou a dar as grazas.