A sombra da mina de ouro volve escurecer Corcoesto

09:05 21/10/14

Non se libra a Costa da Morte da sombra do proxecto mineiro de Corcoesto, que se ben para moitos significa unha gran oportunidade laboral. Hoxe coñecemos que a multinacional canadense Edgewater volve á carga e acaba de anunciar que pretende explotar a mina de Corcoesto, un proxecto que xa fora anulado polo Goberno galego. Sen embargo, a multinacional canadiana insiste que mantén "conversacións cun socio potencial español" como "posible aval interesado en adquirir unha propiedade significativa" do proxecto. Unha situación, di que permitiría cumprir os requisitos esixidos polas autoridades españolas.

Segundo a empresa, a firma interesada en participar na mina de Corcoesto é "unha das maiores de España" en servizos de "enxeñaría e construción" que disporía dunha "significativa posición de propiedade" do proxecto. Sen embargo, non menciona en ningún momento de que empresa se trata, pero precisa que "os termos financeiros para a transacción foron acordados en principio e a aprobación final do Goberno será determinada en breve".

De feito, a empresa insiste en que "as negociacións con este socio español tiveron lugar coa Xunta mediante, en plena participación e contemplando os distintos permisos requiridos".

A través dun comunicado, Edgewater defende que este acordo potencial tería os “beneficios adecuados” para satisfacer os criterios solicitados polo Goberno galego, especialmente os de tipo financeiro". Así, suliña que a investiu máis de 35 millóns de dólares en estudos e sondaxes previas no proxecto, que obtivo unha declaración de impacto ambiental en decembro de 2012.

A Xunta comunicou a principios deste ano a Edgewater o rexeitamento definitivo ao proxecto presentado por parte da súa filial Mineira de Corcoesto, por "incumprir os requisitos legais esixidos".

“Desde a adquisición do proxecto de Corcoesto en 2009, a empresa levou a cabo todos os pasos legais e administrativos necesarios para demostrar que o proxecto é economicamente viable, como confirmou o propio Goberno galego en varias ocasións no pasado", apunta neste comunicado o seu director xeral, George Salamis.

O máximo responsable da multinacional asegura que "está á espera dunha resposta do Goberno galego para finalizar o acordo con este socio e renovar o proceso de desenvolvemento do permiso mineiro". "Edgewater espera unha resposta positiva do Goberno galego para concluír a esperada transacción co socio español e renovar o proceso que permita o desenvolvemento da mina", conclúe.

A loita, nun congreso internacional

Mentres, varias plataformas costeiras están no Encontro Mundial BAN CYANIDE. Aquí vemos, por exemplo, a contramínate xunto con outros grupos de Europa establecendo as bases para loitar internacionalmente contra o uso do cianuro na actividade mineira.